Padulong sa tiunayng buhi nga Simbahan

Sa labing unang higayon, gipangulohan ni Arsobispo Alberto S. Uy ang kaparian sa Artsidyosesis sa Sugbu sa binuwan nga rekoleksyon niini. Gipili ni Arsobispo Uy nga mahimong tema sa rekoleksyon ang tema sa Artsidyosesis alang sa siyam ka tuig nga pagpangandam sa ikagatos nga senteneryo niini sa pagka-artsidyosesis: “The Archdiocese of Cebu 2034: Journeying together as a Church fully alive.”

Usa sa mga gipahimug-atan ni Arsobispo Uy sa rekoleksyon nga mahinungdanon kaayo mao ang punto nga kinahanglan magsugod sa kaparian ang sinodalidad o dungan nga pagpanaw isip simbahan. Matud niya nga malisod matudloan ug madasig ang katawhan sa dungan nga pagpanaw kon dili kini mahimo una sa tanan sa kaparian: “Kon dili kita magkadungan sa paglakaw, unsaon nato pagtudlo ang katawhan sa pagdungan og lakaw? Kon dili kita maantigo nga maminaw, unsaon nato pagsangyaw og simbahan nga maantigo maminaw? Kon dili kita mopasaylo, unsaon nato pagwali kabahin og kalooy?”

Sa ato pa, gidasig ni Arsobispo Uy ang kaparian sa pagpangulo sa katawhan sa Simbahan pinaagi sa maayong panig-ingnan kabahin sa sinodalidad: sa pagpaminaw, sa pagsalmot sa misyon, sa pagsaksi sa pagtoo. Tinuod, wala may perpekto nga pari kay ang tanang tawo aduna man gyuy kahuyangan, kakulangan, ug kasaypanan, apan ang bokasyon sa pagkapari pinaagi sa grasya gikan sa Dios unta magsilbi nga inspirasyon sa katawhan sa Dios aron madasig sa pagpalawom sa pagtoo ug pagpadayag niini diha sa pagpuyo og santos nga kinabuhi. Mahitabo lamang kini kon ang kaparian mahimong matinud-anon sa iyang bokasyon hangtod sa katapusan.

Sa mga gitumbok nga punto ni Arsobispo Uy, atong makita nga daghang mga butang nga kinahanglan buhaton ug usbon kon uganing buot kita nga matuman ang damgo nga mamahimong Simbahan nga tiunayng buhi. Usa ka pulong nga iyang gisulti sa kaparian sa iyang pagpasabot sa mga punto sa rekoleksyon – “paningkamotan.” Nagkahulogan kini og pagkamapaubsanon sa kaugalingon diha sa pag-angkon nga ang maayong butang dili lamang malampos pinaagi sa kaugalingong kusog sa tawo, apan labaw sa tanan pinaagi sa gahum ug panabang sa Dios. Apan, angay usab kining balansehon ug bantayan. Kay usahay raba ang pulong nga “paningkamotan” magtukmod sa tawo nga mokompyansa kay luyo sa hunahuna buhaton lang ang kutob sa maabot bisan tuod og mahimo pang pun-an ang makab-ot.