Ang pag-ugmad ug pagpatubo sa bokasyon

Sa nilabay nga semana, nagmalampuson nga gipahigayon sa artsidyosesis sa Sugbo ang tinuig nga Vocation Campaing. Niining programa sa tulo ka seminaryo sa artsidyosesis, ipadala ang mga seminarista sa lainlaing mga parokya sakop sa artsidyosesis aron pagpangampanya sa mga kabatan-onan nga mosanong sa bokasyon sa pagkapari ug kinabuhing relihiyoso. Apan sa pagpahigayon sa kampanya gipahimug-atan nga ang bokasyon dili lamang ang pagkapari o pagka-relihiyoso kondili lainlain ang tubag sa tawag sa Dios sa iyang katawhan sa pagpuyo og balaan ug maayong kinabuhi. Adunay magminyo, magpari, magmadre, anaa say uban nga ulitaw o dalaga lang sa tibuok kinabuhi.

Bisan unsa pa man ang bokasyon sa matag tawo, dili ikalimod nga kon tan-awon pag-ayo ang bokasyon gasa sa Dios nga mahimo lamang motubo ug molambo kon ugmaron ug suportaan kin isa tibuok matuhuon nga katilingban. Ang tinuig nga kampanya sa bokasyon kahimanan lamang sa pagpahinumdum sa katawhan sa Dios nga ang tanan gitawag niya aron magpuyo sa kinabuhi nga gitagana niya. Ug nga tipik ug kabahin sa pagtubag sa iyang tawag mao ang pag-aninaw kon unsa gayod ang bokasyon (ang kinabuhi) nga gitagana niya alang sa matag usa.

Kon magkuwang sa pag-aninaw ang usa ka tawo kon unsa gayod ang bokasyon alang kaniya pinasubay sa kabubut-on sa Dios, dakong posibilidad nga mag-antos siya sa tibuok niyang kinabuhi. Dinhi mosulod ang mga suliran ug mga pagmahay kay wala man aninawa pag-ayo kon mao kining kinabuhi (bokasyon) alang kaniya nga iyang gisudlan. Mga kaso niini sama anang modesisyon lang sa pagminyo bisan og wala hunahunaa pag-ayo kon sakto na ba ang panahon ug kon makahimo ba gyud sila sa paghatag sa kaugalingon sa usag-usa diha sa gugma nga way kondisyon. Lain sab nga kaso ang misanong sa bokasyon sa pagkapari nga nagtakuban sa daghang mga kahuyangan sa seminarista pa, ug sa dihang napari na diha na manggawas ang daghang kakulangan nga mosantop hinuon sa pagdugang sa mga samad sa Simbahan.

Dili gayod sayon ang pagsanong mahigugmaong imbitasyon sa Ginoong Dios nga magpuyo uban sa iyang grasya ug gugma. Mao nga ang Simbahan nagtudlo nga ang pagtubag sa bokasyon nagkinahanglan og taas nga proseso sa pag-aninaw ug pag-umol o pormasyon. Mao kini gidalit sa mga seminaryo diin ang mga batan-ong lalaki mosulod aron sa pag-aninaw kon husto ba nga sila motubag sa bokasyon isip pari puhon. Wala magpasabot nga kon ang usa ka lalaki nakasulod na sa seminaryo, mapari nga gyud siya o kon maundang man gani sa seminaryo sa bisan unsa nga rason wala na siya makasanong sa bokasyon kay sa katapusan ang pagsanong sa bokasyon nagdepende man sa integridad sa tawo. Walay mahitabo nga pagsanong sa bokasyon kon ang dili tibuok ang tawo nga buot mosanong sa tawag sa Dios sa pagkabalaan.