Kanus-a pa kaha kita makat-on?

Minilyon ka mga tawo ang misalmot sa kasaulogan sa Piyesta Senyor, apan gatosan ka tonelada usab ang nahabiling basura – nagpasad, gipasagdan sa kadalanan. Makalulooy apan makabilib ang mga tawo nga nagbudlay sa pagpanghipos sa mga basura aron mahiuli ang kalimpyo sa dakbayan sa Sugbu. Si Arsobispo Alberto S. mismo nagmapasalamaton sa mga street cleaners sa ilang paningkamot nga mahipos ang daghan kaayong basura human sa Sinulog. Sayod siya nga dili kini sayon.

Nakapadugang sa kasakit aning hitaboa mao nga dugay na kining kalihokan ang Sinulog, ug bisan unsang dagko nga kalihokan dinhi sa Sugbu o bisan asa nga dapit sa nasud, apan ang mga Pilipino wala gihapon mabatoni ang hiyas sa paghipos sa mga basura. Asa kahang dapita napakyas ang gobyerno ug ang katilingban nganong wala man gyud kini mahimong tipik ug kabahin sa atong pagka-Pilipino ang paghibos sa mga basura human sa dagkong mga selebrasyon.

Katiman-an nga ang mga hapon gikataho nga milimpyo sa stadium human sa duwa nga football sa World Cup 2022. Daghang mga hapon ang nanan-aw tungod kay duwa man sa Japan batok sa Germany diin ang Japan nagmadaugon. Kon ang ubang mga tawo naghudyaka ug nagselebrar na sa kadaugan human sa dula, ang mag hapon wala manglakaw hangtod nga nahinlo ang stadium nga napuno sa mga basura nga dili gani sila ang nagpasagad. Gina-ingon nga nasilsil sa hunahuna sa mga hapon ang pagkalimpyado tungod kay gitudlo ug gipabuhat kini kanila sukad pa sa ilang pagkabata. Mao nga nahimo gayod kining tipik ug kabahin sa ilang pagkatawo isip mga hapon. Ug karon nabantog sila ug ang ilang nasud sa pagkalimpyo gumikan sa pagkat-on ug pagbansay sa semple kaayo nga taras nga mao ang paglimpyo sa palibot.

Dinhi sa Pilipinas gitudlo man usab ang pagkalimpyado sa mga kabataan sa mga eskwelahan. Apan ang dakong kulang mao ang maayong panig-ingnan sa mga dagko sa katilingban. Hangtod nga aduna pay mga dagko o hamtong nga mga tawo ang magpasagad sa ilang mga basura, ang mga kabataan bisan pa og gitudloan og ensakto sa eskwelahan dakong posibilidad nga dili masilsil sa alimpatakan ang paglimpyo sa kaugalingon ug sa nataran. Ug hangtod nga ang gobyerno magkuwang sa pagpatuman sa daghan kaayong balaod ug ordinansya kabahin sa ensaktong paghipos ug paglabay sa basura, ang mga kabataan sa sunod henerasyon dili malig-on diha sa ilang mga nakat-onan nga maayo sa tulonghaan ilabi na ang paglimpyo sa palibot.

Ang dakong kausaban dili lamang mahimo sa kaugalingon lang. Magsugod kini sa tagsatagsa kanato apan kinahanglan duyogan sa tanan aron malig-on ug molungtad hangtod nga kini mahimo nang kabahin sa maayong pamatasan.