Padayon ang paglaum

Nahuman na ang Jubileo sa Paglaum nga gisaulog sa Simbahan lukop sa kalibutan niadtong tuig 2025. Dinhi sa Artsidyosesis sa Sugbu, gitak-op kini niadtong Disyembre 30, 2025 pinaagig usa ka Santos nga Misa pinangulohan ni Arsobispo Alberto S. Uy didto sa Cebu Metropolitan Cathedral of the Most Holy Name of Jesus.

Gipahimug-atan ni Arsobispo Uy nga bisan tuod og nahuman na ang Jubileo magpadayon ang paglaum sa katawhan. Ug tinuod, dili man gayod mohunong ang paglaum kay kini usa ka gasa nga gikan mismo sa Dios. Ang paglaum usa sa tulo ka teyolokanhong hiyas uban ang laing duha nga pagtoo ug paghigugma. Kaning tulo adunay talagsaong kalambigitan kay nagsalamin kini sa grasya ug presensiya sa Dios mao nga dili gayod kini molubad, dili gayud kini mahanaw, dili gayod kini mawad-an og kahulogan sa katawhan nga nagatoo sa Dios nga labing halangdon.

Maanindto nga kini gipahimug-atan sa talahurong Arsobispo sa Sugbu tungod kay kitang mga tawo adunay tendensiya nga daling makalimot. Kung molabay na gani ang mga kasaulogan ug mga kalihokan daw molurang pud ang atong kadasig sa mga bililhon ug maayong butang. Basin unya og tungod kay nahuman na ang Jubileo sa paglaum mohunong nalang pud ta og laum, mohunong nalang pud ta og paghatag og paglaum sa uban. Mao ra gud pud na og panahon sa Pasko. Daghan nato naghunahuna nga ang panahon sa pagpanghatag og regalo kay inig panahon ra sa Pasko. Sa pagkatinuod, kon kita nakasabot gayod, bisan og dili Pasko anaay daghang mga kahigayonan nga kita gitawag sa paghatag: paghatag sa atong kaugalingon, sa atong kusog, sa atong katakus, sa atong kinabuhi ilabi na ngadto sa labing nanginahanglan sa grasya ug presensiya sa Dios. Laktod pagkasulti, bisan og dili Pasko gidahum kita nga mamahimong instrumento sa presensiya sa Dios sa usag-usa.

Dili unta mahitabo nga kumo nahuman na ang dakong kasaulogan sa Jubileo sa paglaum mahikalimtan nato ang mga mahinungdanong kasinatian ug pagtulon-an nga atong nadawat. Ang talagsaong mga panghitabo, bisan og makasubo, sama sa mga katalagman nagdala ug nagtudlo kanato sa pagkahimong instrumento sa paglaum ilabina ngadto sa mga kaigsuonan nga grabeng naapektahan sa katalagman. Mapatik unta sa atong kasingkasing kining pagkahimong instrument sa paglaum alang sa uban pinaagi sa pagkamatinabangon hangtod na sa mga umaabot nga katuigan ug dili malubong sa paghikalimot. Ang katawhan nga tinuoray naglakaw sa kahayag ni Kristo maantigo nga mohandum ug modumdum sa tinuoray nga tuburan sa kaayo ug kinabuhi.