Kalendaryo

Unsa may imong nadawat nga pinaskohan? Kon aduna man, tingali usa niini mao ang kalendaryo. Nalipay ka ba? O nagbagulbol? Higala, angay gyud intawon nga imong ikalipay tungod kay diha sa kalendaryo imong gidawat ang gasa sa panahon nga balig 365 days sa usa ka tuig. Daw bulawan kini nga bililhon kaayo. Dili ba ginaingon man, “Time is gold?” Busa ikalipay gayud kini ug ikahinangop.

Ako, sa akong bahin, malipay gayod ako kon tagaan ko ug kalendaryo. Ilabi na kon kini dagko ug mga numero. Dili ko kini isab-it kon dili akong laksi-on ang matag panid niini gikan sa bulan sa Enero hangtud sa bulan sa Disyembre ug ipapilit og iladlad sa bongbong dapit sa talad kan-anan, opisina, sa akong kwarto ug sa sakristiya. Sa ingon niini nga paagi, akong maaninaw o malantaw sa tataw ang taliabot nga bulan o mga adlaw sa panaw ning kinabuhi. O mabalik ko og lantaw ug mahanduraw ang mga matam-is, mabulokon o dili kaayo maanindot nga hitabo sa pagligid sa panahon.

Diha sa kalendaryo, atong makita o malili ang takna sa pagsubang og pagsalop sa bulan ug adlaw. Ug sa pagtaob ug paghunas sa dagat. Pagkaanindot diay sa gasa sa panahon gikan sa kahitas-an kon ato kining mapuy-an sa maayong buhat adlaw-adlaw sa tibuok tuig. Ang pula nga numero nagkahulugan sa mga adlaw’ng Dominggo nga diin atong balaanon ug pasalamatan ang Ginoo, o mga adlaw sa mga importanteng hitabo diin ang pipila sa mga santos o mga bayani atong hinumduman ug pasidunggan. Diha sa kalendaryo atong mahinumduman ang mga petsa sa mga kasumaran sa adlaw natawhan, kaminyoon, piyestas, ug uban pang mga anibersaryo diin molig-on ug modasig sa atong mga pagpaningkamot. Pinaagi sa kalendaryo, we can properly plan our work and effectively work our plan. Mapobre man o adunahan patas tang tanan. Kay sa kahitas-an kita sa 365 days gihatagan. Panalanginan unta sa Dios ang tuig 2026. Magmalamboon unta kini ug ipalayo sa tanang matang sa katalagman. Amen.