Bring consolation, not fear

Kay lagi silingan ug miyembro pa gyud sa Legion of Mary og sa kapunongan sa Birhen sa Lourdes, giadto ni Patricia si Carmencita, usa ka masakiton naghigda sa katre ug naglisud na sa pagbangon ug giingnan, “Mari, nabalaka ako sa imong kahimtang. Mangita ko’g pari aron makakompisal ka og mahilogan. Aron inig kahuman nimog kompisal, maka-kalawat kana matag Dominggo. Kay naa man si Iko nga Lay Minister sa atong purok nga mohungit nimo. Uyon ka ba sa akong sugyot? Ug sa hinay nga tingog naningkamot ang masakiton sa pagtubag, “Oo mari, uyon ako nga mokimpisal. Apan ayaw lang intawon na si Padre Elmo kay mahadlok ko kaniya. Estrikto kaayo na siya- kotikutihan! Basin matiwas hinoon ko’g sayo.” Hu hu hu…

Mga igsoon, niining umaabot Pebrero 11, World Day of the Sick, pista sa Birhen sa Lourdes unsa kahay mga hunahuna sa mga masakiton – sila nga anaa sa katre ug dili na makabangon? Makahunahuna kaha sila kanato sa pagsangpit og panabang o dili na lang? Basin muotong na lang ba? Palabihon nga mag-antos ug mohilum kay sa insultuhon o singhagan lang! Dili sayon ang kahimtang sa masakiton. Sila nga mga edaran nga nag-antos tungod sa pagpasakit aron ang mga anak makaeskwela ug mulampos. Asa na kamo? Hinumdumi kini, “Ang taksanan nga inyong gamiton alang sa uban mao usab ang taksanan nga gamiton sa Dios alang kaninyo,” (Lukas 6:38). Ning atong pagsaulog sa World Day of the sick (Pebrero 11); Dili lang unta kita kutob sa pag-ampo. Mobisita kita’s mga masakiton. Magdala’g kalipay ug kahupayan sa ilang lawas ug kalag. Happy Valentines Day pud diay karong Pebrero katorse. Ayaw kalimti. Amen.