Matag Adlaw

Mga igsuon ko diha ni Kristo, alang kanato nga bag-ohay lang nagsaulog sa kapistahan ni Sr. Santo Niño sa miaging Domingo, mabatyagan nato karon ang hinay-hinay nga pagbalik sa mga regular na mga katungdanan o mga kalihokan diin nahisakop ang mas dakong bahin sa atong kinabuhi. Karon usab ang liturhikal nga panahon nga gi-obserbahan sa atong Simbahan mao kining gitawag sa ingles na “Ordinary Time.” Sa pagkadunggog nato niini, siguro ang masabtan nato na mibalik na kita sa atong ordinaryo o normal na gimbuhaton karong mga semanaha human sa Pasko, Bag-ong Tuig, ug sa mga kapistahan. Apan mga igsuon, ang terminong “Ordinary” na gigamit sa paghulagway sa atong liturhikanhong panahon karon sa Simbahan nagagikan sa terminong “ordered” na sa Cebuano pa, “pagkahimutang” o “pagkahan-ay.” Ug mao gayud kini ang gipangandoy ug gipaningkamotan sa pipila kanato – na ang atong kinabuhi mahan-ay ug malayo sa kagubot o kasamok dili lang diha sa atong kaugalingong pagpuyo apan diha usab sa atong mga hinigugma. Sa laktod nga pagkasulti, kining mga adlawa nahimong mga higayon aron hinay-hinay nga mahatagan og kahapsayan ang atong panaw ilabi na ang atong Kristohanong panaw.

Ang ebanghelyo karong Domingoha naghatag kanato og duha ka mga maanindot nga pagtulon-an kung asa ug kanus-a kita pagatagbuon sa Ginoo aron sugdan ang paghatag og direksyon sa atong kinabuhi aron mahapsay kini subay sa iyang kinaadman.

Una, ang lugar. Ang Capernaum usa ka “busy” nga lungsod. Kining lungsora miuswag tungod sa industriya sa pagpanagat ug duol kini sa usa ka dalan sa Romano nga gitawag “Via Maris,” nga nagsilbing komersyal nga agianan nga nagkonektar sa Galilea ngadto sa Siria sa amihanan. Kay dinhi si Jesus nagsugod sa iyang ministeryo, mapamalandungan nato nga ang maayong Ginoo mahimong makatagbo kanato sa mga lugar diin atong ginapuy-an ang labing mga adlaw nato, diha sa mga lugar diin kita nagapundar sa atong kusog ug oras ug nagasalig niini alang sa atong panginabuhi ug kahupayan.

Ikaduha, ang panahon. Anaay usa ka butang nga naghiusa kang Pedro, Andres, ug ang uban pa nga nahimong mga tinun-an sa dihang gisultian sila ni Jesus sa pagsunod Kaniya. Sila nagatutok sa ilang ginabuhat sa dihang nagsugod si Jesus sa pakig-istorya kanila. Matag usa kanila nagalihok sa ilang mga gimbuhaton, ang ilang mga kamot nagakupot sa butang nga may kalabotan sa ilang trabaho, ug isip mga mananagat, kini mao ang ilang mga pukot. Niini mapamalandungan nato nga ang maayong Ginoo mahimong makatagbo kanato sa panahon kanus-a kita okyupado sa mga butang. Ug niining puntuha, nagdasig si Jesus sa pagpili Kaniya, “Kuyog kamo kanako.” Ug ang ilang kinabuhi nabag-o, uban ang ilang pamatasan ug binuhatan ug nahiuyon na kini sa Maayong Balita tungod kay ang Pulong sa Ginoo uban na kanila.

Mga igsuon, God meets us where we are. God meets us as we are. Sa pisikal, emosyonal, ug espirituwal nga bahin sa atong kinabuhi, ang Ginoo anaa aron mosugat ug maggiya kanato. Mamahimo kini tungod kay mitugot kita na giyahan ang atong mga adlaw, sa hinay-hinay, Kaniya nga nagadan-ag sa atong kinabuhi. Diha Kaniya mahiusa unta ang atong hunahuna ug tumong.