Ang Kahayag nga Anaa sa Simbahan

Nagsaulog kita karon sa Epipaniya sa Dios, ang iyang pagpadayag ngadto sa tibuok kabuhatan isip kahayag alang sa tanan. Nabasa nato sa atong ebanghelyo karon kabahin sa mga Maalamong mga Tawo nga batid sa bitoon, mga langyaw ug mga nangita sa kahayag. Sa kanunay, minunot sila sa talagsaon nga bitoon nga puno sa pagsalig. Dili lamang ni sila mga batid sa bitoon apan kabahin usab sila sa laray sa mga pari. Pasabot ani nga anaa usab sila’y mga relihiyosong laraw. Uban sa ilang pagnunot sa bitoon, anaa usab ang ilang paglaum nga ang Dios maoy naghatag kanila og giya gikan sa layo nga dapit padulong sa kamatuoran. Tuod man, sa ilang pag-abot sa pasongan, nasinati nila ang bata uban sa iyang mga ginikanan. Bata nga gamay, huyang apan puno sa diosnong kahayag.

Duha ka mga bulawanaong tinagsip nga mga pagtulon-an ang atong makat-onan: una, ang Epipaniya nagtudlo kanato nga ang kahayag sa Dios dili gayud matago. God’s light cannot be confined. Wherever our hearts search for God, He is already present. Ang iyang pagpadayag sa iyang kahayag, maoy pagpadayag sa iyang walay sukod nga gugma alang sa tanan, labi na sa mga kabus ug mga biniyaan. Matud pa ni Papa Leo XIV sa iyang Sulat Apostolikanhon, Dilexi Te (kon: I have Loved You), “As we contemplate Christ’s love, ‘we too are inspired to be more attentive to the sufferings and needs of others, and confirmed in our efforts to share in his work of liberation as instruments for the spread of his love,’” (Leo, 2025, 1). Ang atong kasaulogan karon ug ang pagmaymay sa atong Santo Papa nagdapit kanato sa matang sa simbahan nga angay natong pagapuy-an—ang simbahan nga sa kanunay buhi. Ang Dios nagpadayag sa iyang kaugalingon ngadto sa tanan. Ug tungod niini, ang Simbahan dili mahimo nga magpakahilom lamang, dili mahimo nga molihay sa mga kamatuoran sa kinabuhi, dili mahimo nga mamatay lang. Ang Simbahan kanunayng buhi tungod kay si Kristo buhi ug nahigugma na’ng daan pinaagi sa pagpadayag sa iyang kaugalingon alang kanato.

Gani, ang mga Maalamon nga mga Tawo nagbiyahe og layo. Apan wala sila mahadlok sa kalisod, sa kakapoy, ug sa kakuyaw, tungod kay nangahas man sila sa pagpangita sa kamatuoran. Ang ila baya’ng panaw nagtudlo kanato nga ang Simbahan kanunayng buhi kon ang matag usa kanato mangahas usab sa pagpangita kanunay kang Cristo. Ang buhi nga simbahan dili unta mahisama kang Herodes ug ang mga tinun-an ug mga batid sa balaod — duol ra unta kaayo sila sa kamatuoran, apan wala sila manumbaling, ni molihok. Nakahibalo man unta sila asa matawo ang Mesiyas, apan wala sila manumbaling bisan paghunahuna aron makasud-ong man lang sa bata. Ang Simbahan mahimong patay dili tungod kay wala si Kristo, kondili tungod kay ang matag usa kanato wala manumbaling sa pagsud-ong sa Dios, ni mangahas paghimo og lakang sa pagpangita sa Dios kay nakaon naman kita sa atong kahibalo.

Ikaduha, sa pag-abot sa mga Tawong Maalamon didto sa pasongan diin anaa ang Balaang Banay, mihalad sila og bulawan, insenso, ug mira. Kining maong mga gasa, dili lamang mga butang, apan timaan sa ilang kinabuhi nga gihalad ngadto sa Dios bisan sila langyaw. Sa samang pagkaagi, ang Simbahan buhi kon ang atong pagtuo makita ug masinati diha sa atong paghalad — paghalad sa atong panahon, sa atong kusog, ug sa atong gugma sa Dios diha sa tanan natong isigkaingon. Ug tapos masinati sa mga Tawong Maalamon ang pagpadayag ni Kristo didto sa pasungan, milakaw sila sa laing dalan. Sama unta kanila, tapos kita makasinati sa pagpadayag sa kahayag sa Dios, manglakaw unta kita sa laing dalan, bag-ong dalan sa atong kinabuhi — ang dalan sa pag-alagad, ang dalan sa pagkamatarung, ang dalan sa gugma ug pakigdait.

Hinumduman nato nga sa Epipaniya, ang kahayag sa Dios buhi diha sa Simbahan. Ang Simbahan dili ang balay-alampoanan o balay-patigayon; kita ang Simbahan. Anaa ang kahayag ni Kristo sa matag usa kanato – ang Simbahan nga kanunay’ng buhi – sa atong pamilya, sa katilingban, ug sa tibuok kalibutan. Hinaut nga sama sa mga Maalamong Tawo, mangita kita kang Kristo, mosunod sa kahayag, ug magpakita sa kalibutan nga ang Simbahan tinuod nga buhi tungod kay si Kristo ania kanato.