Bag-ong Tuig (Napud)

Og buot huna-hunaon, petsa ra sa kalendaryo ang nabag-o kada bag-ong tuig. Simbolikanhon ang ato’ng pagsaulog ug gisaulog nga “bag-ong” tuig. Sa esensya, nag padayon ang mga relasyon, problema, ug ang mga institusyon sa atoang kinabuhi. Busa angayang hinumdoman nato kada saulog ug ampo nga ang gipangayo ta sa Labaw’ng Makagagahom kay dili “magic” o “misteryo” kun dili ang mga birtud na maoy atoang gikinahanglan aron molahutay sa ato’ng misyon ug tahas niining kalibutana.

Kining mga birtuda, nag lakip sa pagkamakanunayon, paglaum, ug hugot na pagsalig sa Dios. Kay kung i-lambos-lambos na ta sa mga katalagman ug kadaot, kining maong mga birtud gayud ang atoang gunitan hangtod asa kutob ang mga pagsulay.

Sa nilabay’ng tuig, 2025, nakita ug nasinati ta, nga walay “maayong laki” natong tanan kung ma dasmagan gyud tas mga pagsulay sa kalibutan. Lami pa kaayo ang “bring it on!” sa dihang mitapos ang 2024 ug misulod tas 2025. Apan sa dihang gilinog ug gilunop na ta, na “lanay” samag “ice cream nga laway ras kabayo” ang atong mga “resolution.” Midayon tag syagit o tyabaw! Ang uban pwerteng “singka” ngadtos langit. Ang uban wa kasabot og unsay ilang bati-on.

Hastang mga politiko nga pwerteng hambugeroha sa ilang mga “development plan” ug mga “strategic initiatives” wa ka ugpo sa “laparo” sa kinaiyahan. Murag mga napilding boksedor nga gi-dabu-dabuhan ni Tino. Naa pay uban nga murag mga baki nga dayog lukso o dagan, larga diri larga didto pag linog ug bagyo. Di gani ma kita ang uban sa dihang ni atubang na gayud kita sa krisis. Diha nalang nang-gawas pag siga nas adlaw ug nga nihayag na ang kalangitan. Dayon og diskurso, pa lami, tunol-tunol og “ayuda”, ug buwa-buwa sa ilang baba inig interview sa media. Ang mga tawo pa-ilad gihapon. Mga lider ug mga politikong walay sama ka “but-buton”, iyahay og pangangkon ug pasigarbohay sa ilang mga nahimo. Ang walay ika-buga kutob ras pag-pang-daot, kaso diri ug kaso didto. Hugaw pa sa salin sa baha ning ubang mga naas gobierno.

Sa natad sa politika, kita makahinumdom kung unsa ka “unpredictable” ang kinabuhi labaw na niadtong 2025. Ang mga kanhiay’ng “solid” na mga supporters sa ilang mga politiko, karon nang-bali. Nag-buwag na ang mga pro-X ug pro-Y [itago ta lang ilang mga ngalan]. Apan niadto bayang 2022, pwerte gyung lamia sa gibalandra’ng “panaghiusa” (unity) nga karon mas bungkag pas nabombahang Hiroshima.

Daghan pa kaayo tag atubangon sa 2026 ug sa mga umaabot pang mga katuigan. Walay nag-gunit og “crystal ball” nato. Walay naay “power” nga makatag-an sa umaabot. Ang “forecast” sa mga political analyst dili ig-layo sa mga panagna ni Madame Auring. Maka-ingon ko usahay nga kining mga “political analysis” kay tabla rag “horoscope.” Grabe ka “fluid” (samag tubig) ang mga butang. Aduna tay ma diskitahan na mga “pattern” apan sa katapusan sa adlaw, pagsalig sa Dios ang atoang pinaka magunitan.

Angay ug sibo lamang nga sa pagsugat nato sa tuig, gisaulog pud nato ang kapiyestahan ni Maria atoang inahan. Modelo siya sa pag-paubos, pagtuo, ug hugot na pagsalig sa Dios. Sama kang Maria, kita mga “yano” ra pud baya. Wala tay impluwensya nga makapalihok ug makapasibog sa mga butang.

Sama ni Maria, kita mag-ampo ug mohangad sa Kahitas-an uban sa ato’ng mapahiubsanong paghangyo na ang Dios mo pakitag “kusog pinaagi sa iyang bukton”, ug nga iyang ipatibulaag “ang mga tigpahitaas diha sa mga pagpamalandong sa ilang mga kasingkasing…” (Lk. 1:51).

Malipayo’ng 2026 kanatong tanan! Padayon!