Si San Ignacio ug ang Spiritual Exercises

Bag-o ra gyu’ng natapos ang buwan sa Hulyo kung asa gisaulog ta ang kapistahan ni San Ignacio de Loyola. Mas naila isip nagtukod sa Compaña de Jesus kun Society of Jesus (Heswita). Apan susama ka importante sa iyang pagka magtutukod sa maong relihiyosong kapunongan kay ang iyang gasa sa Simbahan nga mao ang “Spiritual Exercises” (SpEx). Kini usa ka dako kaayong kontribusyon sa espirituhanong tradisyon sa atong pagtuo, nga naka tampo sa pagtubo diha sa pag-ampo sa liboan o gani gatusan ka liboang mga pari, seminarista, layko, relihiyoso, magtutudlo, ug bisan mga estudyante.

Kining espirituhanong ehersisyo, gihimo ni Ignacio sa dihang wa pa siya ma ordenahe pag ka pari. Tungod niini, adunay mga komentarista sa pagtuon sa SpEx nga nag ingon, nga dili parehas ang “Ignatian spirituality” sa “Jesuit spirituality.” Ang nahiuna kay usa ka “espirituhanong gasa” para sa tanan nga gustong mo tubag sa tawag sa Dios. Ang na-ulahi kay usa ka espesipikong paagi sa maong pagtubag.

Sa gisulat ko na kaniadto, “sama nga ang lawas nagkinahanglang lig-onon, ang kalag kinahanglang mag-bansaybansay.” Ilabi na niining atoang kapanahunan karon, kun asa daghang tinubdan sa kalibog, kitang mga matuohon kinahanglang mo kat-on niining gitawag og “discernment. Sa gisulti ko na, “ma palpak gyud ta sa atoang kinabuhi tungod kay matabunan ta (clouded) sa atoang kaugalingong gusto.”

Si Ignacio isip usa sundalo, nasayod nga diha sa gubat dili paigo ang abilidad na mo wara-wara sa espada. Dili daugon ang gubat sa gidaghanon sa armas lamang. Dili ang armas mismo maoy makapahimo sa sundalo nga hanas ug maayo. Labaw sa tanan, gikinahanglan ang hustong “paminsar” kung unsaon pag-atake o ba kaha gani kung kinahanglang mo atras, kay dili pa higayon na padayonon ang gubat.

Sama sa tinuod nga sundalo sa gubat, ang Kristiyano isip sundalo ni Kristo kinahanglang adunay “lig-ong espiritu.” Kini nag pasabot nga siya kay desididong mo-atraka, ug labaw sa tanan, desididong mo da-og! Kini nagkinahanglan og laing abilidad nga mao ang pagtuon aron masabtan ang lihok ug estilo sa “kontra” o “kaaway.” Kinsa man ang atoang kontra, unsa man ang gahom niya, unsa man ang iyang abilidad?

Si Ignacio nakat-on tungod mismo sa iyang SpEx, nga ang yawa kay maro ug mangingilad nga dako. Balikon ko ang gisulat ko kaniadto, “[s]ama sa anay (termite), mo sulod ang yawa bisan sa balay sa Dios. Kini mo kit-kit hangtod maguba ang relasyon sa Dios ug sa tawo. Kay mao ra gyud ni ang iyang tuyo ug tumong. Gamiton hasta ning atong pagka-balaan.” Gamiton mang gani sa yawa ang mga butang sa Simbahan sama sa “liturhiya” aron kita mag ka gubot, mag ka bikil, ug ma bahin-bahin, apil na pud ang atong mga gipang tun’ang teolohiya. Labaw sa tanan, ang tentasyon sa “kwarta” ilabi na kung kita magpalusot dayon diha sa atong pagka-materialista gawi ang ngalan sa Ginoo.

Dinhi mo sulod ang gitawag og “discernment”. Kasagaran dili mo presentar ang kaaway sa iyang kaugalingon “in black and white.” Kung black and white pa lang unta ang pili-anan nato diri o dinha sa natad sa moralidad, dali ra kaayong ipili. Apan, adunay daghang mga gitawag og “gray area” mga “ambiguity”, “fluidity”, ug “ambivalence.” Mao man ganing dili dali i-reject ang “war on drugs”. Mao bitawng adunay mga pari nga nahulog pud ug nag lakaw-lakaw niining gitawag natog mga “terrains of ambivalence” ug “moral landscapes of ambiguity.” Dili dali pananglit i-conclude nga dili angayang bendisyonan ang mga bayot.

Kung unta ikaw ug ako pa lang ang Ginoo, aw humana ang lalis, sirado na ang estorya. Apan salamat sa Dios, dili kita ang Ginoo! Mao nang kining pagpangita sa gusto sa Dios alang kanato, kining gitawag sa Ignatian Spirituality og “finding God in all things” – usa ka dakong tahas ug hagit diha sa discernment. Kini usa ka “lifetime process.”
Angayan natong tawgon ang Espiritu Santo aron pinaagi kaniya, uban kaniya, ug diha kaniya, makat-on ta niining gitawag og “discernment of spirits.”