Nganong Nagduhaduha Ka Man?

Mga igsuon ko diha ni Kristo, usa sa mga pinakadramatikong panghitabo sa Ebanghelyo mao ang pagnaog ni Pedro gikan sa sakayan aron pagduol kang Jesus nga naglakaw sa tubig. Si Pedro mismo ang mihangyo niini, “Ginoo, kon ikaw kana, palakta ako sa tubig nganha kanimo.” Ug mitubag si Jesus, “Dali ngari.” Busa, mikawas si Pedro gikan sa sakayan ug milakaw sa tubig padulong kang Jesus.

Maanindot na ato kining hinuklugan. Si Pedro usa ka mangingisda. Suhito siya sa dagat ug nasayod siya nga ang tawo dili makalakaw sa tubig. Nasayod siya sa kakusog sa balod ug sa kapeligrohan nga iyang giatubang. Apan mikawas gihapon siya. Wala siya minaog ug milakaw tungod kay nahimong linaw ang tubig. Milakaw siya tungod kay gitawag siya ni Jesus. Ang iyang pagsalig kang Jesus mas labaw pa sa iyang kahibalo bahin sa unsay mahimo ug dili mahimo sa tawo.

Samtang nagatutok siya kang Jesus, nakalakaw siya. Apan adunay usa ka butang nga nausab. Nagsugod siya sa pagtan-aw sa kakusog nga hangin ug namatikdan niya ang mga balod nga naglibot kaniya. Nakita niya pag-usab ang kapeligrohan. Ug sa dihang ang iyang pagtagad mibalhin gikan kang Jesus ngadto sa unos, nagsugod usab siya sa pagkaunlod.

Makapalandong kita niini kay tingali mao usab ang nahitabo kanato. Adunay mga panahon nga lig-on ang atong pagtuo tungod kay klaro pa kaayo nato ang presensya sa Ginoo. Apan moabot ang problema, ang kapakyasan, ang sakit, ang kabalaka, ug ang kawalay kasigurohan. Hinay-hinay, imbis nga si Kristo ang atong tutokan, ang atong mga problema na ang atong kanunayng gihunahuna. Daw ang problema nahimong mas dako pa kay sa Dios nga atong gisaligan.

Ang pagtuo wala nagpasabot nga dili na nato makita ang unos. Dili usab kini pagpakaaron-ingnon nga walay problema. Tinuod gayod ang kusog nga hangin nga nakita ni Pedro. Apan, mga igsuon, ang pagtuo mao ang paghinumdom nga ang atong gitutokan mas importante kaysa sa unsay nagpalibot kanato. Ang unos tinuod, apan mas labaw pa si Kristo. Ang problema mahimong dako, apan dili kini labaw kay sa Ginoo.

Nangutana ni Jesus kang Pedro, “Nganong nagduhaduha ka man?” Kinsa ang atong gitutokan kung giputos na kita ang mga unos—ang atong problema ba, o si Kristo?
Ug sa dihang nagsugod na si Pedro sa pagkaunlod, wala siya pasagdi ni Jesus. Misangpit si Pedro: “Ginoo, luwasa ako!” Ug diha-diha dayon, gituy-od ni Jesus ang Iyang kamot ug gigunitan siya. Bisan pa sa pagduhaduha ni Pedro, wala siya gibiyaan sa Ginoo. Ang pagtuo ni Pedro gakurog, apan ang kamot ni Kristo wala gayod gakurog.

Mga igsuon, tingali adunay mga unos ug mga balod sa atong kinabuhi karon. Wala kita sugoa ni Jesus nga magdamgo lang na nagmata. Ang Iyang tawag mao ang pagpadayon sa pagtutok Kaniya taliwala niini. Kay ang tumong sa Kristohanong kinabuhi dili ang pagkinabuhi nga walay unos. Ang tumong mao ang makat-on sa pagpadayon sa pagtutok kang Kristo bisan taliwala sa unos. Ug kon mahitabo nga magsugod na kita sa pagkaunlod, ang Ginoo nagpabilin nga andam sa pagtuy-od sa Iyang kamot ug pagkuha kanato gikan sa tubig.