Abi og pabor sa modernong kahimanan ug panahon, nganong uwahi man gihapon?

Dili ikalimod nga kasagaran sa mga tawo karon pabor gyud sa pag-uswag sa teknolohiya, kahimanan, ug kalihokan nga mapuslan sa katilingban. Kay kon dili pa kini tinuod walay mamalit og selpon, TV ug uban pa, ug dili mosikat ang AI nga teknolohiya. Gani kasarangan natong madunggan nga “moderno na ang panahon karon. Mao na kini ang uso.”

Apan nganong aduna may mga lakang nga paatras ug uwahi gihapon kon buot hunahunaon? Sama pananglit sa urban planning, arkitektura, ug pag-amping sa kalikopan. Bag-ohay lang nagkagubot ang publiko tungod sa pagpamutol sa mga karaan ug makasaysayanong mga kahoy didto sa lungsod sa Oslob, Cebu tungod sa plano nga pagtukod ug sports and cultural complex sa maong lungsod.

Ang mga pangutana nga naglangkob sa maong panghitabo: Sakto ba ang proseso ug permiso sa hingtungdang ahensiya aron pagtugot sa pagputol niadtong mga kahoy? Ug kon adunay permiso sa pagputol, kinahanglan bang putlon ang mga kahoy?

Sigon sa inisyal nga impormasyon, adunay permit nga gipakita ang mga hingtungdan sa dihang ilang gipamutol ang napulo ka karaan ug dagkong kahoy sa Oslob. Apan sa dihang daghan ang ni-reklamo ug mibuto na ang isyu sa social media, gikataho nga ang DENR-CENRO mipagawas og mando sa pagpahunong sa pagpamutol, apan ulahi na kay nangaputol na ang mga kahoy.

Ang uban nag-ingon nga kinahanglan pamutlon ang mga kahoy kay aron makahimo og pasilidad nga moderno sa maong lugar. Total nananom bitaw og puli niadtong mga kahoya. Managko ra sab tu mga bag-ong gitanom nga kahoy. Mao kini ang karaan o paatras nga panghunahuna kabahin sa mga plano sa kauswagan sa katilingban. Abi natog pabor sa paabante nga pag-uswag, nganong kinaraan man gihapon ang mahunahunaan? Mura man ni og kadtong presidente sa nasud sa una nga sa dihang gibadlong sa ubang nasud nga dili magtukod og planta sa uling alang sa elektrisidad, namalikas ug miingon “Maayo lang diay og kamo. Kami sab.” Bisan tuod og napamatud-an na nga dakong tampo sa polyusyon ang planta sa uling.

Karon modernong panahon adunay pamaagi sa arkitektura nga gitawag og “BIOPHILIC DESIGN.” Mao kining pagdesenyo sa mga tukoron nga mga edipesyo nga ipasibo ang plano sa kahimtang sa kalikopan: mga kahoy, tanom, sapa, kabukiran, ug uban pa. Imbis nga pamutlon ang mga dagkong kahoy, ipahaum ang desenyo sa edipesyo aron ma-preserba ang kinabuhi sa mga mugna sa Dios nga way kapasidad sa pagdepensa sa kaugalingon kon pamutlon.

Sa California, Estados Unidos usa ka ehemplo ang dako nga buhatan sa Apple Inc. (Apple Park), usa ka kompanya sa teknolohiya, nga gipalibotan sa 9,000 ka mga kahoy ug sa taliwa sa maong edipesyo anaay klase-klaseng mga mananap nga nabuhi. Daghan pa nga susama niini nga arkitektura ang gipanghimo sa lainlaing lugar sa kalibotan. Nganong di man ni maoy sundon dinhi sa atong gobyerno? Nganong nagpabilin man gihapon sa hunahuna ang pagpamutol ug pagpangguba kon adunay plano nga tukuron?

Usa kini ka pruweba nga karong panahona, mahimo nang dili mohukom dayon nga mamutol ug mangguba sa kalikopan sa ngalan sa pagpauswag sa katilingban. Hinonoa, buhaton unta ang tanan aron mapreserba ug maluwas ang tanang matang sa kinabuhi. Kay sa kataposan, ang giluwas ni Kristo dili man lang ang tawo, kondili ang tibuok kalibotan.