Aron molampus sa mga resolusyon sa bag-ong tuig

Matag tuig nabatasan na sa kadaghanan ang paghimo og mga resolusyon sa pag-usab sa kaugalingon kay lage bag-0ng tuig, bag-o usab nga kinabuhi – may nalang sigon sa nabantog nga kanta aning panahona. Ang uban manaad sa kaugalingon nga dili na magbisyo – limpyo na daw siya magkinabuhi: di na manigarilyo, di na maghuboghubog, di na mambabaye (o manglaki), di na mamakak, ug uban pa. Unya inig abot sa sitwasyon nga tentalon, moingon sa kaugalingon, “kausa na lang.”

Makita nato dinhi ang tawhanon nga dagan sa kinabuhi sa tinguha ug kalamposan. Tingale wa nay laing butang nga mas makita nato ang kahuyang sa tawo kondili sa pag-utingkay sa mga listahan sa mga new year’s resolution ug kon pila ka tonelada nga resolusyon ang napakyas sa entiro nga inabuhi.

Tinuod gyud ang mga Pulong sa Ginoong Jesucristo nga nagkanayon, “Kon wala ako, wala kamo mahimo,” (Jn. 15:5). Ug usab ang kanta nga nagtudlo kanato: “Pangitaa ang gingharian ug ang katarong sa Dios. Ug ang tanan igadukang kanimo…” Kay kon ang atong kaugalingon mga laraw ug kusog lang ang atong saligan, murag walay bisag usa nga resolusyon ang matuman. Masugdan man tingale inig Enero apan dili makalahutay inig abot na sa kakapoy kay ang kaugalingon man lang ang gisaligan.

Dinhi atong masabtan nga aron ang atong mga tinguha molampos kinahanglan nga makat-on kitang sugdan kini, sundon, tumanon, ug kompletohon uban ang grasya, presensiya ug gahom sa Dios nga nag-uban kanato.