Mensahe sa bag-ong tuig sa Arsobispo sa Sugbu

Mga hinigugma diha ni Kristo,

Sa atong pagtikang sa Bag-ong Tuig 2026, uban sa mapasalamatong mga kasingkasing, kita nag-abli sa usa ka bag-ong panid sa atong panaw isip Sugboanong Simbahan. Kini nga tuig nag-awhag kanato nga mopalawom sa atong pagtan-aw sa atong pagkasimbahan, ilabi na nga nagkaduol kita sa ika-gatosan nga kasumaran sa atong pagka-Artsidyosesis.

Gidapit kita karong tuiga nga mamahimong usa ka Listening Church—usa ka Simbahan nga maantigo ug matinud-anon sa pagpaminaw: pagpaminaw sa Pulong sa Diyos ug pagpaminaw sa tingog sa katawhan.

Si San Pablo nagpahinumdom kanato nga “diha sa pagpaminaw mahimugso ang pagtuo.” (cf. Rm. 10:17) Kung kita maminaw uban ang kasingkasing nga abli, ang pagtuo motubo, mabuhi, ug mamunga.

Ang tinud-anay nga pagpaminaw naghatag og kinabuhi sa atong pagtuo. Ug kining pagtuo nga gipalambo sa pagpaminaw makita diha sa usa ka Simbahan nga tinud-anay nga buhi—usa ka Simbahan nga maigmat sa lihok sa Espiritu Santo sa atong personal nga kinabuhi ug sa atong katilingban; sensitibo sa kasakit ug panginahanglan sa katawhan; matinud-anon sa pag-atiman sa kalikopan nga gipiyal kanato sa Diyos; ug abtik sa paghimo og mga lakang aron motubag sa nagkadaiyang tawag sa pagpangalad.

Ang Bag-ong Tuig nagdala og bag-ong mga hagit, apan nagdala usab kini og bag-ong mga grasya. Sa atong pagsugod sa 2026, atong hiusahon ang atong mga tinguha. Manlakaw kita nga manag-uban isip usa ka Sugboanong Simbahan. Hinaut nga diha sa tiunay nga pagpaminaw, ang Pulong sa Diyos nga nagpakatawo mahimugso sa atong mga kasingkasing ug mo-aghat kanato sa pagkinabuhi nga dalaygon atubangan sa Diyos ug sa mga tawo.

Bulahang Bag-ong Tuig kanatong tanan. Sugdan nato ang tuig diha sa tiunay nga pagpaminaw paingon sa usa ka Sugboanong Simbahanan nga tinud-anay nga buhi!

+ALBERTO S. UY, D.D.

Arsobispo sa Sugbu