Arsobispo, nag-awhag sa kaparian sa dungan sa pagpanaw padulong sa buhi nga Simbahan

Enero 27, 2026 – Giawhag ni Arsobispo Alberto S. Uy ang kaparian sa Artsidyosesis sa Sugbu sa dungan nga pagpanaw padulong sa pagka-buhi nga Simbahan sa pagmarka sa ika-usa ka gatos nga tuig sa pagka-artsidyosesis.

Sa gipahigayon nga labing unang binuwan nga rekoleksyon ni Arsobispo Uy uban sa iyang mga kaparian karong tuig 2026, didto sa Galilee Center sa Pope John XXIII Minor Seminary sa dakbayan sa Sugbu, gipili sa arsobispo nga mahimong tema sa rekoleksyon ang tema sa siyam ka tuig nga pagpangandam alang sa sentenaryo sa artsidyosesis inig tuig 2034 – “The Archdiocese of Cebu 2034: Journeying together as a Church fully alive.”

Ang Dyosesis sa Sugbu giisa ni Pope Pius XI sa pagka artsidyosesis niatong Abril 28, 1934 ug ang unang arsobispo niini mao si Arsobispo Gabriel Reyes.

Sa pakigpulong ni Arsobispo Uy sa kaparian, iyang gipahimug-atan ang importansya sa sinodalidad o dungan nga pagpanaw sa Simbahan nga kinahanglan magsugod sa pundok sa mga pari. Managlahi man tuod ang matag pari og hunahuna, kinaiya, ug kasinatian ang mga pari, apan matud niya, nga gitawag ang matag usa sa Ginoo aron mahiusa, “not uniformity but unity; not thinking the same but walking together.”

Matud niya, kon aduna may lugar diin unang makita ang sinodalidad kini diha sa kaparian, “If we cannot walk together, how can we teach the people to walk together? If we cannot listen to one another, how can we speak of a listening church? If we cannot forgive one another, how can we preach mercy?” Ang katawhan motuo lamang sa sinodalidad kon makita nila kini sa kaparian.

Gibatbat ni Arsobispo Uy ang mga butang nga gikinahanglan alang sa tiunay nga buhi nga Simbahan: ang Pagtoo, Pagsaksi, Pagsaulog (Creed, Code, Cult).

Ang Simbahan buhi kon ang mga sakop nakasabot sa ilang pagtoo (Creed). Ang Simbahan buhi kon ang mga sakop nagsaulog sa ilang pagtoo (Cult). Ang Simbahan buhi kon ang Simbahan nagsaksi sa ilang pagtoo (Code).
Apan ang Simbahan mahimo lamang tiunay nga buhi kon ang tulo anaa. Bisan gani usa lamang sa tulo ang mawagtang, ang Simbahan mahimong huyang; buhi man kini apan dili siya tiunay nga buhi.

Niining puntoha gihimo niyang eksampol ang panghitabo sa Sinulog 2026. Nasabtan tuod sa katawhan ang pagtoo sa Sto. Niño. Gani labing dako ang kasaulogan niini, apan alang sa arsobispo kwestyonable ang pagsaksi tungod kay human sa pagsaulog tonelada man ang basura nga nagpasad bisan pa og sa wala pa ang kasaulogan ensakto man ang pahimangno gikan sa gobyerno ug sa simbahan kabahin sa responsable nga paglabay sa basura.

Matud sa arsobispo adunay tulo kabuok nga tagaan og atensiyon sa panaw padulong sa buhi nga Simbahan. Una, mao ang pagpalawom sa pagsabot sa Kristohanong pagtoo sa katawhan pinaagi sa pagpalig-on sa mga programa sa katesismo, Basic Ecclesial Communities, ug organisasyon sa mga layko ug lainlaing mga kapunongan.

Ikaduha nga paningkamotan mao ang pagsaulog nga makahuloganon sa mga sakramento ug liturhiya sa simbahan. Gitumbok ni Arsobispo Uy nga dili lang ang gidaghanon sa Santos nga Misa ang sigurohon kondili labaw sa tanan ang kalidad sa pagpahigayon sa Santos nga Misa. Mahitabo man gud nga sa kadaghan sa Misa nga saulogon sa usa ka pari dakong posibilidad nga kini lamulamuon nalang pagsaulog. Giawhag niya ang kaparian sa pangpangitag paagi nga mahimong maanindot ug mabulokon ang pagsaulog sa liturhiya ug mga sakramento taliwa sa kadako sa panginahanglan pastoral sa katawhan.
Ikatulo mao nga ang katawhan nga konkretong nagsaksi sa pagtoo sa matag adlaw nga pagkinabuhi. Madasig unta sa kaparian ang katawhan nga mahimong matinud-anong Kristiyano dili lamang matag Domingo kondili adlawng tanan; dili lamang sulod sa simbahan kondili sa lainlaing lugar usab. Matud ni Uy, ang usa ka maayong Kristiyano, usa ka maayo nga lumulopyo.