SOTAA himuong tinuig nga buluhaton

Gipahayag ni Cebu Archbishop Alberto S. Uy sa usa ka press conference nga iyang himuong regular o tinuig nga buluhaton ang paghatag sa State of the Archdiocese Address (SOTAA).

Matod sa arsobispo, ang lokal nga Sugboanong simbahan layo ra sa “perpekto” nga simbahan, nagsulti siya nga ang Dios lamang mao ang perpekto.

Bisan pa man nga dili perpekto ang artsidyosesis, mapasalamaton ang arsobispo nga ang kahimtang sa simbahan anaa sa grado nga 8/10, pasabot nga “ok” ang kahimtang.

“Undeniably, ang katawhan sa Cebu, duol sa Ginoo. Makit-an nato ni sa mga celebrations,” matod niya.

Iyang gihinumdoman nga niadtong mga panahon sa trahedya sama sa linog ug bagyo, daghang mga tao nga adunay malumo nga kasing-kasing.

“Maayo ang atoang kahimtang diri sa simbahan sa Cebu,” dugang niya.

Nakigpulong niadtong Martes, Abril 28, 2026, pipila ka oras sa wala pa niya ipresentar ang iyang SOTAA sa Cebu Metropolitan Cathedral, matod ni Archbishop Uy nga sukad sa iyang paglingkod isip arsobispo, naghimo siya og mga konsultasyon sa tibuok artsidyosesis.

Matod niya nga sa usa sa mga konsultasyon, adunay pari nga nangutana kon aduna bay klarong timeframe ang iyang mga plano isip arsobispo, tungod kay sa nangaging kasinatian, ang mga plano sa arsobispo usahay mapunta ra sa “wala.”

“Sa among kasinatian, aduna’y mga maayong tinguha unya nanglabay ang mga katuigan, nawala raman pud,” gihinumdoman ni Uy ang kabalaka sa usa ka pari.

“Nabalaka gyud siya nga basin kutob ra ni sa maayong plano o maayong tinguha, mao tu nga naabot sa akong huna-huna nga, ‘I promise you, every year I will make a report,’” matod ni Uy.

Gipasabot usab ni Uy nga ang SOTAA mahimong usa ka paagi aron ipahibalo sa publiko ang kasamtangang kahimtang sa artsidyosesis.

Matod niya nga pinaagi sa SOTAA, masayran sa publiko ang kahimtang sa mga pari, relihiyoso, mga magtutuo, mga parokya, mga misyon nga gihimo, mga hagit, ug mga paglaum alang sa umaabot.

Iyang gipahinumdoman ang publiko nga dili magdahom og “bombastic” nga SOTAA, tungod kay dili siya politiko kondili usa ka magbalantay sa panon.

Gipahigayon ang iyang instalasyon isip ikalima nga Arsobispo sa Sugbu niadtong Septiyembre 30, 2025, ug nakapangalagad na siya sa lokal nga Simbahan sulod sa kapin pito ka bulan. | John Paul Seblos