Libre nga healthcare alang sa kaparian sa Artsidyosesis sa Sugbu

Disyembre 30, 2025 – Pormal nga gilagdaan ang kasabutan tali sa LH Foundation Inc., Clinica Prime Cebu, ug Archdiocese of Cebu kabahin sa libre nga primary healthcare alang sa mga kaparian sa artsidyosesis.

Atol sa pagsaulog sa panagtigum sa kaparian sa Artsidyosesis sa Sugbu alang sa pagsaulog sa Pasko, gipahibalo ang dakong gasa alang sa mga pari nga mao ang libre nga primary healthcare pinaagi sa LH Foundation Inc. ug Clinica Prime Cebu.

Sulod sa daghang katuigan ang kasigurohan sa kapiskay sa panglawas ug serbisyo sa tambalanan sa kaparian nahimong dakong kabalaka sa mga pari tungod sa daghang mga praktikal nga rason hinungdan nga usahay makaapektar kini sa pagpangalagad sa mga pari.

Karon, pinaagi sa kasabutan nga pormal nga gisudlan sa Archdiocese of Cebu, LH Foundation Inc, ug Clinica Prime Cebu mamahimo nang kampanti ang mga kaparian sa ilang kaugmaon kabahin sa kapiskay sa panglawas gumikan sa libre nga primary healthcare nga gidalit.

Siyempre, matud sa usa ka pari diha sa pundok, wala kini magpasabot nga awtomatiko nga mapiskay ang panglawas gumikan niining kasabutan sa libre nga primary healthcare. Gikinahanglan gihapon ang pag-amping sa kaugalingon diha sa saktong pagkaon, ehersisyo, ug saktong pahuway.

Sa iyang bahin, gipadayag ni Arsobispo Alberto S. Uy ang iyang pasalamat diha sa iyang Facebook page “Maymay sa Magbalantay” ngadto sa LH Foundation Inc. ug Clinica Prime Cebu ug sa mga chairpersons niini nga sila si Mr. Bernie Liu ug Mr. Edmun Liu.

Matud niya nga ang libre nga primary healthcare sa kaparian nga giabaga sa LH Foundation ug himuon pinaagi sa Clinica Prime Cebu usa ka gasa nga labaw pa kay sa materyal nga suporta. Usa kini ka gasa sa pag-amoma, paglantaw sa unahan, ug tinud-anay nga pagpakabana alang niadtong walay puas nga nangalagad sa katawhan sa Dios.

Subay niini, gipasabot niya ang kaparian nga dakong pagpakabana sa mga layko makatandog unta sa ilang mga kasingkasing ug magpahinumdum kanila nga wala sila mag-inusara sa ministeryo kay ang katawhan matuod nga nag-amoma kanila.

Sa katapusan, nagpasalamat si Arsobispo Uy sa LH Foundation ug Clinica Prime Cebu sa ilang pagkamanggihatagon, sa ilang panlantaw, ug sa ilang kasingkasing alang sa pagpangalagad. Gi-ampo niya sila og daghang panalangin sa ilang pagtabang sa kaparian. | BL