Mga simbahan gihimong dangpanan sa mga tao atol sa bagyong Tino

“Isip Arsobispo sa Sugbu, akong giingnan ang tanang mga pari nga ablihan ang mga simbahan sulod sa artsidyosesis isip pasilongan alang niadtong nangita og kadangpan panahon sa bagyo,” ingon ni Arsobispo Alberto S. Uy sa iningles.

Mihatag og instruksyon si Arsobispo Uy adlawng Lunes, usa ka adlaw sa wala pa miabot ang bagyong Tino sa dakbayan sa Sugbu nga nagdala og dakong uwan hinungdan sa dako ug kusog nga pagbaha sa daghang mga dagkong sapa sa Sugbu.

Sa pag-abot sa bagyong Tino (international name Kalmaegi) dinhi sa probinsya sa Sugbu sa buntag sa Martes, Nob. 4, 2025, daghang tawo ang nagpasilong sa mga simbahan sa dakbayan, apan wala kini nakalikay sa kontrobersiya.

Apil sa mga midawat og evacuees ang Cebu Metropolitan Cathedral. Apan samtang nag-uwan pa, usa ka hulagway sa mga street dwellers nga nagahigda sa gawas sa Sto. Rosario Parish ang ni-viral sa social media pinaagi sa usa ka Cebu news outlet, nga midani og online nga kasuko tungod sa giingong “way kalooy” nga pagtrato gikan sa mga awtoridad sa Simbahan. “Only one picture but speaks volumes,” sumala sa usa ka netizen. Ang uban mitubag, “The Church should let them in,” ug, “Mag-preach mog kaayohan sa mga tawo pero wala ni-reflect sa inyong simbahan,” nga nagpakita sa kasuko sa publiko.

Sa usa ka pahayag nga nadawat sa Bag-ong Lungsoranon niadtong Martes, giklaro ni Fr. Joseph “Jojo” de Aquino, priest in-charge sa Sto. Rosario Parish Caritas, nga ang mga street dwellers, mga 12 ka tawo, duha ka beses nga giadto ug giawhag nga mopasilong sulod sa simbahan, apan sila mismo ang midumili. “Giadto pud na sila sa Cebu City Mobile Task Force, wala gihapon mikuyog. Gitagaan ni sila og pagkaon ug ubang gamit,” matod ni de Aquino, nga midugang nga ang uban sa grupo kay nagpasilong ug gitagaan og mga habol.

Ang viral nga post nakaangkon og 8,900 ka reaksyon, 923 ka komento, ug kapin sa 3,000 ka shares sa wala pa mosidlak pagbalik ang panahon. Sa hapon sa Martes, wala na’y evacuees nga nakita sa gawas sa parokya.

Sa Mabolo, matod sa mga staff sa parokya, walay evacuees nga miabot atol sa bagyo, apan ang Abtanan sa Kaluoy center nga gipuy-an og 60 ka tawo naghatag og init nga pagkaon ug mga sinina sa 10 ka street dwellers sa sayong buntag sa Martes. “Magtan-aw ka sa ilang mga nawong, kung naa pa silay laing kapadulngan, dili gyud sila manganhi. Kaluoy sab ani nila, kung wala mi magluto, wala silay kaon tibuok adlaw,” matod ni Jasmin Bevoso, usa ka volunteer nga lima na ka tuig nagsilbi.

Iyang gidugang nga ang mga street dwellers, gitouhang gikan pa sa Cathedral, mitabang sa pagpanglimpyo sa palibot sa parokya sa Mabolo pagkahuman sa bagyo, pinaagi sa pagpanghipos og daghang sako sa mga sagbot ug nangatumba nga sanga. Dugang pa ni Bevoso nga usa sa street dweller nipugos og kuha sa iyahang silhig aron maoy motiwas og pagpanglimpyo. “Dili ta mahadlok, kay ang Ginoo naa ibabaw sa hangin,” dugang pa ni Bevoso, nga nagsulti gikan sa homiliya sa pari.

Samtang daghang Sugboanon ang nakapasilong ug luwas gumikan sa bagyo, sa opisyal nga mga report gikataho nga adunay labing menos 54 ang namatay sa tibuok probinsya: siyam sa Cebu City, siyam sa Mandaue, walo sa Danao, 15 sa Compostela, pito sa Talisay, ug unom sa Balamban. Adunay 28 pa nga giingong nawagtang.

Si Gobernadora Pamela Baricuatro mipahibalo nga gibutang na ang tibuok probinsya sa ilalum sa state of calamity, aron magamit ang Quick Response Funds alang sa mga operasyon sa pagpangluwas, tabang, ug pag-ayo. | John Paul Seblos