Magtotoo, aktibista nagkahiusa sa pag-ampo batok korapsyon

Kapin sa libo ka mga tawo ang nagkatigum didto sa Fuente Osmeña Circle niadtong Dominggo, Sept. 21, 2025, alang sa usa ka prayer rally nga nakapundok sa mga magtotoo ug aktibista sa panawagan sa pagsugpo sa korapsyon.

Mga rosaryohan gikuptan ug pag-ampo sa chaplet sa Divine Mercy nadungog gikan sa mga magtotoo samtang ang grupo sa protesta nagsyagit og panawagan sa tulobagon ug pagpabilanggo sa korap nga mga opisyal sa gobyerno. Bisan sa ilang managlahi nga pagtugon, ang mga grupo nag-ambit sa usa ka paglaum: ang paghunong sa korapsyon sa gobyerno.

Mga pari, madre, seminarista, estudyante, ug mga parokyano miapil sa kalihokan. Si Padre Zenon Guanzon, kinsa nangulo sa pipila ka mga seminarista, miingon pinaagi sa interbiyu pag Dominggo nga taliwala sa presensiya sa banggiitang grupo sa raliyista, ang prayer rally nagpahinumdum sa tanan nga ang pagkabayolente dili masulbad pinaagi og mas daghan pa nga kabayolente.

“Dili gyud na pwede atbangan ang evil with another evil. Kung mao na, pakungon nalang mong duha,” miingon siya, samtang nagpadayon sa paglaum alang sa malinawon nga rally. Miingon usab siya nga ang pagsalmot sa grupo sa mga relihiyoso tungod sa klaro nga rason, nga mao ang panawagan sa tulobagon ug sa paghunong sa korapsyon.

Gipasabot ni Padre Guanzon nga kadtong mga miapil sa prayer rally nagsul-ob og puti aron pagpakita sa pagka-walay gidapigan sa politika.

“What is important is truth, justice, accountability, etc.,” miingon siya.

(Ang importante mao ang kamatuoran, hustisya, tulobagon, ug uban pa).

Sa dihang gipanguta og personal nga kwestiyon kabahin sa mga butang nga iyang gilauman nga mahunong, si Padre Guanzon na-emosyonal. Samtang nagluha ang mga mata, miingon siya nga ang nakahimamat siya og daghang mga tawo nga padayon nga nag-antos tungod sa inhustisya. Sa katapusan, gipasalig ni Padre Guanzon nga ang Dios nakadungog sa hilak sa katawhan.

Taliwala sa syagit sa beterano nga mga tigprotesta nga nanawagan sa resignasyon, ang mga seminarista sama ni Nell Joseph Villarin nakasinati sa ilang unang rally. Si Villarin miingon nga ang iyang pagsalmot usa ka manipestayon sa iyang pag-ampo, opinion, ug paglaum sa paghunong sa inhustisya ug iregularidad sa gobyerno.

“Dili lang kay ma-dayag sa public ang mga issues, pero unta naa sab manifestation sa kausaban dili lang kay magsige ta og persecute o panaot sa usa’g usa,” miingon siya, nagsalig sa paglaum alang sa solusyon nga dili mosantop sa bayolente o panagbahin.

“Kana untang resolution nga makahatag og peaceful end, or at least, tubag sa atong mga pangutana,” miingon siya.

Miingon si Villarin nga bisan pa sa presensiya sa extreme rallyists, ang iyang motibasyon mao ang malinawon nga protesta. Lakip sa iyang pag-ampo mao usab ang katapusan sa korapsyon ug iregularidad sulod sa Simbahan. | John Paul Seblos