“Kon ang Dios nagtawag kanimo, pagmaisugon sa pagpaminaw”

Nagmalampuson nga gipahigayon sa Artsidyosesis sa Sugbu ang tinuig nga kampanya sa bokasyon niadtong Peb. 1 hangtod petsa 8.

Sulod sa usa ka semana nadestino sa mga parokya ang mga seminarista sa tulo ka seminaryo sa artsidyosesis: Seminario Mayor de San Carlos (SMSC); San Carlos Seminary College (SCSC); Pope John XXIII Seminary (PJSXXIII). Didto misuroy sila sa lainlaing mga eskwelahan aron paghisgot kabahin sa bokasyon o tawag alang sa tanang tawo nga mao ang pagpuyo og balaang kinabuhi. Niining maong bokasyon o tawag sa pagkabalaan mahimong lainlain ang pagsanong – pagkapari o kinabuhi sa relihiyoso, kaminyoon, ug balaang pag-inusa.

Gawas sa pagsuroy sa mga eskwelahan, gihimamat usab sa mga seminarista ang mga lainlaing kapunongan sa parokya, ilabi na ang mga kabatan-onan, aron pakighinabi kanila kabahin sa bokasyon. Aduna usab ubang mga seminarista nga misuroy sa kapilya ug mga kabalayan sa parokya aron pakig-istorya sa mga pamilya ilabi na kadtong adunay mga anak nga nagpadayag og kagustohan nga mosulod sa seminaryo. Sa adlaw sa Domingo, ang mga seminarista misulti atubangan sa mga parokyano sulod sa Santos nga Misa aron kapahimug-atan ang importansiya sa pagsanong sa bokasyon.

Bisan tuod og bokasyon sa tanan ang gihisgotan panahon sa kampanya, tuyo ug tumong gihapon niining kalihokan sa artsidyosesis ang pag-awhag sa mga lalaki ug babaye sa pagsulod sa seminaryo o kombento aron pagsanong sa bokasyon sa pagka-pari ug relihiyoso.

Adunay obserbasyon karon nga nagkagamay ang mosulod sa seminaryo ug relihiyoso nga kinabuhi. Daghan ang gibanabana nga hinungdan niini usa na ang modernong panahon diin daghang mga butang ang nakaagni sa atensiyon sa mga kabatan-onan ilabi na ang teknolohiya ug mga kalibutanong ideyolohiya.

Atol sa pagsaulog sa Piyesta sa Presentasyon ni Jesus sa Templo niadtong Peb. 2, si Arsobispo Alberto S. Uy mitudlo sa katawhan nga kon nakabati og tawag ang usa ka tawo dili siya angay mahadlok kay ang seminaryo ug kombento dili lugar sa mga masulob-on. Matud niya, kon naghunahuna ang uban nga ang mga pari ug madre masulob-on nga mga tawo, mahimong duawon ang ilang mga puloy-anan ug makita nga malipayon sila.

Mipuno siya sa pag-ingon nga kon ang Dios nagtawag kanimo, pagmaisugon sa pagpaminaw, pagmaisugon sa pagsuway. Ang Simbahan nagkinahanglan kanimo. Gipasalig ni Arsobispo Uy nga ang kalipay nga gipangita sa kinabuhi makaplagan diha sa paghatag sa tibuok kaugalingon sa Dios. | BL