KASUKKO batok korapsyon gilusad sa mga kapunongan ug lider sa Sugbu

Usa ka lapad nga alyansa sa mga lider sa Simbahan, sibil nga katilingban, ug mga grupo sa komunidad ang opisyal nga naglunsad sa Kalihukang Sugboanon Kontra Korapsyon (Kasukko), usa ka interfaith ug multi-sectoral nga kalihukan nga nagpasalig sa pakigbisog batok sa sistematikong korapsyon.

Gipahigayon ang paglunsad niadtong Martes, Nob. 18, 2025, sa Archdiocesan Shrine of the Our Lady of Guadalupe sa dakbayan sa Sugbo, nga nagsugod pinaagi sa usa ka misa.

Sa iyang homiliya, giingon ni Padre Antoni Maria Rosales, OFM, nga ang Santos nga Misa dili lamang usa ka seremonyas kondili “usa ka panagtagbo uban ni Jesus.” Base sa Ebanghelyo sa adlaw nga nagsaysay bahin ni Zaqueo, usa ka tigsingil sa buhis nga nabag-o tungod sa pagtuo, nakapangutana si Rosales kung nganong nagpadayon gihapon ang korapsyon sa usa ka nasud nga puno sa Kristiyano sama sa Pilipinas.

“Why are they corrupt? What happened? We have just celebrated 500 years of Christianity, but had we not produced better, more honest Christians? Perhaps, we have failed,” matod ni Fr. Rosales samtang iyang gi-awhag ang mga magtutuo nga ipakita ang mga gipangtudlo ni Kristo bisag gawas na sa Misa.

(Ngano man nga korap sila? Unsa may nahitabo? Bag-o ra man ta nagsaulog sa 500 ka tuig sa Kristiyanismo, apan wala ba kita nakahimo og mas maayo, mas matinud-anon nga mga Kristiyano? Tingali napakyas kita.)

Apil sa mga mitambong mao si Obispo Fely Tenchavez sa United Church of Christ in the Philippines (UCCP), Retired Judge Menrado Paredes, ug Jaime Paglinawan sa Bayan Central Visayas, uban sa mga representante gikan sa lain-laing sektor: akademya, kabatan-onan, mga non-government organization (NGOs), ug mga grupo sa mga mamumuo.

Sa iyang pakigpulong, gihisgutan ni Paglinawan nga 22 porsiyento sa mga Pilipino ang nag-antos gihapon sa kagutom bisan pa sa kadaghan sa mga resources sa nasud. Gihisgotan usab niya nga konektado kini sa kawad-on sa kalidad sa edukasyon ug serbisyo medikal nga maoy mga konsekwensiya sa korapsyon.

Sa ilang pahayag, giingon sa Kasukkonga ang ilang tumong mao ang “pagtigum sa labing lapad nga network sa mga anti-korapsyon nga kalihukan sa Sugbo,” ug nga ang korapsyon isip usa ka moral ug social nga isyu kinahanglan atubangon sa usa ka pamaagi: “pinaagi sa espiritu sa demokratikong partisipasyon.”

Natapos ang kalihukan pinaagi sa simbolikong pagpirma sa usa ka pamahayag sa kahiusahan nga gimantala sa usa ka tarpaulin, gisundan sa pagpatingog sa mga gagmayng bagting samtang naglakaw ang mga nagpasiugda gikan sa altar padulong sa atubangan sa simbahan.

Apil sa mga nagpasiugda sa kalihukan mao ang Alliance of Concerned Teachers (ACT) Cebu, Promotion of Church People’s Response (PCPR) Cebu, Kabataan Kontra Korapsyon, Bayan Central Visayas, Archdiocesan Shrine and Parish of Our Lady of Guadalupe, ug Cebu Archdiocesan Commission on Social Advocacies. | John Paul Seblos