Arsobispo mipahimangno batok sa sugal labot sa Sto. Niño

Mapaubsanong mipahimangno ug mihangyo si Arsobispo Alberto S. Uy sa mga organizers sa kalihokan sa Sinulog Festival sa paglikay sa pagdawat og kwarta gikan sa mga pasugalan.

Sa iyang Facebook page, “Maymay sa Magbalantay” ug unya usab sa “The Roman Catholic Archdiocese of Cebu” niadtong Enero 9, gibatbat pag-ayo ni Uy nganong dili maayo nga modawat og kwarta gikan sa pasugalan ang mga organizers sa pinakadakong piyesta sa Sugbu nga mao ang Sinulog. Matud niya nga ang maong mga sponsorships makatigum man tuod og pundo apan naghatag usab kini ug sukwahi nga mensahe sa mga magtotoo ug sa mas halapad nga komunidad.

Una, sukwahi kini sa hiyas sa Santo Niño. Gipasabot ni Uy nga ang Sto. Niño nagsimbolo sa pagka-inosente, kaputli, ug pagsalig sa Dios. Ang mga pasugalan nalambigit sa mga kinaiya ug palibot nga magdala ngadto sa adiksyon, kaguba sa pamilya, kawala sa pinansyal, ug kalibog sa moralidad. “Alingning a sacred celebration with industries that often contribute to social problems does not honor the values the Santo Niño represents,” ingon ni Uy.

Ikaduha, sukwahi kini sa gitudlo nga moralidad. Dili mahimong ang Simbahan modasig sa mga pamilya sa pagsalikway sa makaguba nga buhat samtang tugotan nga pundohan ang mga sagradong kasaulogan sa mga grupo o indibidwal nga konektado sa maong makaguba nga buhat. Ang pagbuhat sa ingon, matud ni Uy, usa ka iskandalo – usa ka sitwasyon diin ang mga magtotoo makahunahuna nga ang Simbahan uyon o nagtugot sa sugal isip kabahin sa pagkinabuhi o paagi sa lingawlingaw.

Ikatulo, ang dili pagdawat og kwarta gikan sa sugal nanalipod sa integridad ug kredibilidad sa kasaulogan sa Sinulog. Matud ni Uy nga ang Sinulog usa ka gamhanang instrument sa ebanghelisasyon diin liboan, ilabi na ang mga kabatan-onan, ang naglantaw niini isip inspirasyon ug giya. Ang pagdawat og sponsorship gikan sa mga pasugalan magrisgo nga makahunahuna ang publiko nga ang Sinulog kabahin lang sa kwarta.

Ikaupat, ang dili pagdawat ug kwarta alang sa Sinulog makaisa sa dignidad sa mga pamilya ug sa mga kabus. Gipasabot ni Uy nga ang sugal nakaapektar sa kabus sa pagkawagtang sa kon unsay gamay nga anaa nila. Dili ta makapangayo sa Santo Niño nga panalanginan ang mga pamilya samtang nag-imbitar og suporta gikan sa mga industriya nga, sa daghang kaso, nakatampo sa pagkaguba ug kakabusa sa pamilya.

Ikalima, ang dili pagdawat og kwarta gikan sa sugal nagdasig og responsable nga pagkapiniyalan. Gidasig ni Uy ang mga organizers nga mangita og katambayayong nga nasubay sa hiyas sa pagtoo, pamilya, kultura, ug komunidad. Daghan ang mga institusyon nga andam mosuporta sa piyesta senyor nga dili makakompromiso sa moralidad.

Sa katapusan nihangyo si Uy nga tugotan ang Sinulog nga magpabiling piyesta nga tiunay nga nagsalamin sa kalipay, kaputli, ug kahayag sa Santo Niño. | BL