Ang Dalaygong Padre Juan – Gula 28

Malipayon nga gisugat nila ni Padre Juan, Roberto, ug mga kauban sa parokya si Rogelio sa paggawas niya sa prisohan. Kini human gikusokuso og sermon ni Padre Juan si Roberto nga nauwaw nga moangkon sa iyang igsuon nga nabilanggo bisan tuod og kini napasanginlan lamang nga nangawat, ug karon nakagawas na gumikan kay nadakpan na ang tinuoray nga kawatan.

Naglisod og sabot si Padre Juan nganong nabuhat kadto ni Roberto nga unta kanunay man siyang nag-alagad sa simbahan ug gani siya pa karon ang pangulo sa Parish Pastoral Council. Nakahinuklog si Padre Juan sa reyalidad sa kahuyangan sa tawo, ug nga kon wala pa ang Dios nga maoy nagpadayag sa tanang maayong butang, unsaon naman lang ang tawo? Asa man siya paingon ug unsa pud kahay dagway sa katilingban kon ang mga kinaiya sama sa nahitabo ni Roberto ang magdaghan? May man gani kay makanunayon ang gugma ug kalooy sa Dios. Wala siya motugot nga magpabilin si Roberto sa iyang kahuyangan ug kasaypanan. Alang kang Padre Juan, ang panghitabo didto sa prisohan probidensiya sa Dios nga maoy hinungdan sa panag-uli sa managsuon nga si Roberto ug Rogelio.

Bisan tuod og na highblood gamay, nalipay lang gihapon si Padre Juan nga nagsud-ong sa iyang mga kauban nga nagsadya sa kadaugan batok sa, maingon tang punga, pagkasukamod sa kinabuhi.

“Salamat kaayo, Padre!” ingon ni Rogelio sa iyang pagduol kang Padre Juan.

“Way sapayan, Rogelio. Gikalipay ko nga nahatagan ka gayod og hustisya ug nakakat-on og leksyon ang imong manoy nga si Roberto,” tubag ni Padre Juan samtang mipahiyom kang Roberto.

“Pasensiya gyud kaayo, Padre. Nauwaw na hinuon ko nimo,” ingon ni Roberto.

“Naana sad ka ana, Roberto. Kanang imong uwaw-uwaw magdala gyud na nimo sa di maayo.”

“Ay sige, Padre. Sukad karon di na ko mauwaw!” Nangatawa silang tulo.

“Na hala sige. Manguli na ta kay daghan pa ta’g asikasohon sa parokya kay kahibaw na mo…human sa Pasko, ang Sinulog napud ang atong ipahigayon,” ingon ni Padre Juan.

Milabay ang pipila ka adlaw sa parokya nga malinawon ang pagpahigayon sa novena alang sa Piyesta Senyor. Lage kay ang parokya ni Padre Juan anaa man nahimutang sa dakbayan sa Sugbu dako gayod ang pagsaulog sa Piyesta Senyor matag tuig. Gani, daghan sa iyang mga parokyano, ilabi na ang mga kabatan-onan, apil man sa Sinulog Festival o paindigay sa sayaw sa Sinulog.

Sa ikaduhang adlaw sa nobernaryo, samtang nagsunod si Padre Juan sa Facebook page sa Basilica, may nakita siya sa iyang newsfeed nga usa ka post nga adunay litrato sa usa ka babaye nga nanagkot sa basilica, nakasenina ug pula nga sleeveless blouse. Wa dayon siya makakuha unsay gikagubtan sa maong post sa Facebook hangtod nga nabasa niya ang caption:
“Unsa may naa anang ilok ni Imee Marcos nga nasugtan man na siya makasulod sa Basilica samtang ang ubang mga tawo wala makasulod kay nag-sleeveless ug nakalapas kuno sa dress code?”

Nakugang si Padre Juan sa iyang pagkasabot sa viral nga post, “Na! Mao na lage ni. Kadakong istoryahon ani.” (SUMPAYAN)