Arsobispo nagpasalamat sa street cleaners, pari nag-awhag sa mas maayo nga solusyon sa basura human sa Sinulog

Dili na ikalimod nga sa matag tuig saulogon ang Piyesta Senyor, tonelada nga basura ang mahabilin ug hiposon sa dakbayan sa Sugbu. Mga plastic nga botelya ug selopin, mga papel ug putos sa mga pagkaon ang magpasad sa kadalanan nga maoy sagubangon sa dakbayan ug hiposon.

Daghan ang makapangutana kon kanus-a kaha makat-on ang mga Pinoy sa pagka-responsable sa paghipos, dili lang sa kaugalingong basura, kondili lakip na ang basura nga wa mailhi ang tag-iya. Kay lage ang Pinoy nabatasan nga magpakabana lang sa kaugalingong basura. Kumo kay dili man iyang basura dili lang sab tagdon.

Si Padre Jonas Yap, ang pangulo sa Cebu Archdiocesan Commission on Environmental Concerns (CACEC), nakapaskil gyud dayon gamit ang dagkong mga letra sa iyang Facebook pagkasunod adlaw human sa Sinulog, “Gianad gyud nato nga naay mosunod nga molimpyo sa mga gilabay nga basura matag Sinulog. Wala na bay laing solusyon?”

Nakadani kini og pipila ka mga komentaryo sa mga netizens sama sa, “Disiplina ang kihanglan ana nila…para makamatngon nga dli magpataka og labay sa basura…,” matud ni Junjun Apas.

“Cleanliness is next to godliness. It begins with you,” sigon ni Josefina Lopez Satuita.

“’NAANAD’ ug MAGSALIG nga naay mohipos ug sunod sa ilang basura, Kay moingon man ‘unsay gamit sa tiglimpyo,’ kapaet nalang gyud sa atong attitude ug ingon Ani nalang. The same hands nga nag wara2x ‘kanamo malooy ka unta….and the same hands nga naglabay sa basura way PAGPAKABANA malooy kaha nato ang Sto. Niño? Padayon nalang gyud tas atong pag ampo aning mga kaigsoonan natong mga ‘buloy’ nga makamatngon sila sa ilang dili maayong gibuhat before sila makasinati sa GABA or paningil sa nagbuhat sa kalibutan, kuwang pa siguro ang baha? Kamo diha? What do you think?” sigon ni Sweetie Narvasa.

Sa iyang bahin, gipasalamatan ni Arsobispo Alberto S. Uy, pinaagi sa iyang Facebook page Maymay sa Magbalantay, ang mga street sweepers nga nagbudlay pag-ayo panahon sa Sinulog ug hangtod na sa pagkahuman niini aron paghipos sa daghang mga basura na nahabilin.

Buot niyang ipadayag ang iyang sinsero nga pasalamat ug kalipay ngadto sa mga street sweepers ug sanitation workers sa Cebu City Environment and Natural Resources Office (CENRO) nga nagbudlay pag-ayo sa paglimpyo sa kadalanan human ang Sinulog Grand Parade niadtong Enero 18, 2026.

Matud niya, nga samtang ang kadaghanan namahuway human sa kapistahan, sila hilom ug matinud-anong nagtrabaho – nanilhig, nangolekta, ug nagpahiuli sa kahapsay sa dakbayan. Dili man tuod makita sa kadaghanan ang ilang trabaho, apan sayod niini ang Dios ug ang mapasalamatong katawhan.

Mipuno si Uy sa pag-ingon nga sila (street cleaners) nakapahinumdum kanato nga ang matuod nga espiritu sa Sinulog dili lamang makita sa sayaw ug selebrasyon, kondili usab sa serbisyo, responsibilidad, ug pagpakabana sa atong komon nga puloy-anan. Matud ni Uy, nakatabang sila nga ang debosyon sa Sto. Niño dili lamang mapadayag sa kalipay, apan usab sa disiplina, kalimpyo, ug respeto sa kamugnaan. | John Paul Seblos