Arsobispo mipahimug-at sa kahiusahan atol sa pagsaulog sa Sinulog 2026

Nagmalampuson ang pagsaulog sa pinakadako nga piyesta dinhi sa nasud, dinhi sa Sugbu, ang duyan sa Kristiyanismo sa Asya, ang Sinulog o Piyesta Senyor.

Human sa pagsaulog sa Pasko sa Pagkatawo sa Ginoo, ang mga Sugboanon mahinangpon nang mosaulog sa Piyesta Senyor sa buwan sa Enero. Ang Sugbu gitugotan sa Batikano sa pagsaulog sa Piyesta Senyor matag ikatulo nga Domingo sa Enero. Napulog-usa ang mga misa nga nakahan-ay matag adlaw sa novena sugod Enero 9 hangtod 17. Ang mga magtotoo miambit sa daghang mga pamalandong sa mga kaparian ug obispo nga nangulo sa matag Misa pahinungod kang Senyor Santo Niño.

Gipahigayon usab ang mga dagkong kalihokan nga may kalambigitan sa Piyesta Senyor sama pananglit sa Walk with Jesus, Walk with Mary niadtong Enero 16, ang Fluvial Parade ug Grand Solemn Procession sa adlaw sa Visperas. Makita sa mga litrato ang pagkabuhi sa kadagatan sa Mactan Channel gumikan sa daghang mga sakayan nga mikuyog sa imahen sa Balaang Bata sakay sa dako nga barko, ug ang gikataho sa Philippine National Police nga 1.9 milyones ka mga magtotoo nga mikuyog sa Grand Solemn Procession karong tuiga.

Sa adlaw sa kapistahan, gipangulohan ni Arsobispo Alberto S. Uy ang Solemn Pontifical Mass pagka alas 6 ang takna sa buntag. Sa gihapon sa walay paglubad, gitambungan kini sa daghang mga magtotoo, kaparian, ug kaobispohan aron mag “Pit Senyor.”

Sa iyang wali, giawhag ni Uy dili lang ang mga politiko ug pangulo sa gobyerno apan lakip na ang kaparian, relihiyoso, ug layko sa paghiusa ug paglihok alang sa kaayohan sa tanan, sa pagpakita og solidaridad ug sinodalidad isip usa ka katawhan nga nagpanaw padulong sa Dios.

“In the Señor Santo Niño, we are one, meaning we are united with Christ not because of our human efforts but because of his redeeming love. Iya man ning lihok, sa Dios man ni, dili man ni ato,” ingon ni Uy.

“Sa panahon sa kalisdanan, ang labing importanteng butang mao ang atong kahiusahan. Unsay babag niini? Ang garbo. Kon gusto magpalabwanay o magpaunhanay, way kalinaw. Kon maghari ang garboso, way ayo. Di ta magkadimao,” matud niya.