Dili batok sa kauswagan ang pag-amping sa mga lakang

Niadtong Agosto 21, 2026, sa pakighinabi ni Pope Leo sa mga miyembro sa International Catholic Legislators Network (ICLN), gi-awhag niya ang mga magbabalaod nga mga Katoliko sa paghimo og mga polisiya o balaodnon nga nag-amping sa mga katawhan, ilabi na ang pamilya, batok sa mga piligro sa paggamit og artificial intelligence (AI).

Matud niya, ang kalibotan wala magkinahanglan og artificial intelligence nga makapagamay sa pagkatawo. Hinonoa, gikinahanglan sa kalibotan ang hunahuna sa tawo nga linamdagan sa kaalam, politikal nga awtoridad giniyahan sa konsensiya, ug kabag-ohan sa teknolohiya diniktahan sa gugma. Sa ingon ini lamang nga paagi, ingon ni Pope Leo XIV, nga mahimo ang artificial intelligence dili kompetensiya sa katawhan kondili sulugoon alang sa komon nga kaayohan.

Nahitabo nga sa pagsulti niini ni Pope Leo XIV, daghan ang mga nikomentaryo nga mibabag kono ang santo papa sa kauswagan sa teknolohiya. Matud pa sa uban, dili kini maayo babagan kay mao naman kini ang dagan sa panahon karon. Nga mosugot kita o sa dili, ang artificial intelligence gigamit naman sa katawhan dinhi sa kalibotan sa daghang mga paagi. Bisan gani ang selpon karon aduna namay artificial intelligence ug ang mga tawo dili lang kabantay naggamit na sab og AI bisan sa semple nga mga buhat diha sa pag-eskwela ug pagtrabaho.

Sa pagkatinuod, kon sabton pag-ayo ang iyang mga pulong, dili man supak ni mobabag sa pagpauswag sa artificial intelligence. Ang iyang gihimo mao lamang ang paggiya ug pagpahimangno nga sama sa ubang mga butang dinhi sa kalibotan, ang artificial intelligence angay tun-an ug gamiton nga mainampingon kay tingale unya og mosantop ngadto sa pagpagamay sa dignidad sa tawo ug pagpahimulos labi na sa mga kabus. Dili abi kay bag-o man ang artificial intelligence, dawaton lang pud ni siya nga sulbad sa daghang mga problema kay ang mga butang niining kalibutan mahimong gamiton sa minaayo, mahimo sad mosantop ngadto sa dautan. Bisan ang inosente kaayo nga butang sama sa tubig mahimong gamiton sa maayo (imnon, ikaligo, ug uban pa), mahimo sad gamiton sa dautan (tigomon, kontrolon ug ibaligyag mahal ngadto sa katawhan).

Dinhi nato makita nga sama sa Maayong Magbalantay, ang Simbahan pinaagi ni Pope Leo XIV, naghimo sa iyang misyon ug tahas nga mag-amping sa panon sa Dios dinhi sa kalibotan pinaagi sa pagmaigmat sa mga panghitabo, kalihokan, ug kauswagan aron pagsiguro nga ang mga kausaban padulong gayod sa kaayohan sa katawhan. Dili babag ang mainampuon ug mainampingong mga lakang. Hinonoa, nagsilbi kini nga lig-ong mga bukton sa hustisya ug katarong nga nag-agak sa katawhan alang sa kaayohan.