Piyesta Senyor

Piyesta Senyor na usab. Human sa Pasko ug Bag-ong Tuig nagpadayon ang kasadya ug paghudyaka tungod sa Piyesta sa Diosnong Bata. Nangguwa na ang mga banderitas sa mga kadalanan. Imo nang madungog ang tukar sa Sinulog Isyagit ug Kusug! Kagahob, kalipay ug kasadya imo na nga masinati sa tibuok Siyudad sa Sugbo. Apan ingon ani na ba kini kasadya kaniadto? Maayo nga ato kining hisgutan kay nagtoo ang uban kanato nga mao na kini ang nahitabo kaniadto. Ang Sugbo kanunay’ng saba ug sadya panahon sa kapistahan ni Senyor Santo Nino apan dili ingon niini ka commercialized. Gani ang prosesyon kaniadto mubo ra man ang ruta. Dili kini muabot sa kadalanan sa B. Rodriguez kondili diha lamang sa mga kadalanan duol sa Basilica sama sa Magallanes, Leon Kilat ug Colon dayong liko sa P. Gomez dayong balik sa Basilica. Diin man diay magsugod ang maong lapad nga selebrasyon nga nilambigit sa mga eskwelahan?

Atong kahinumduman nga ang selebrasyon karon nga namat-an sa atong mga kabataan mao ang Sinulog. Kini nagsugod niadtong panahon ni Mayor Florentino Solon sa tuig 1980 ug sa Custom Collector nga si Sir David “Boy” Odilao. Mao kadtong panahon nga ang gobyerno kusganon nga miawhag sa mga LGU’s sa pag promrote sa kultura ug kasaysayan sa usak ka lugar. Tungod kay kini usa ka religious ug cultural event, naapil usab ang mga eskwelahan sa pagsalmot sa Sinug o Sinulog nga usa ka sayaw pahinungod sa atong mahal nga Santo Nino sa Sugbo. Atong kahinuduman nga ang sinug o sinulog sayaw sa mga maninadahay ug kandila atubangan sa larawan sa Santo Nino didto sa karaang simbahan ni San Agustin dinhi sa Sugbo (karon Basilica na). Apan dili usab nato hikalimtan ang laing sinug o sinulog nga wala manukad sa nataran sa Basilica. Hinoon, nilambo kini sa usa ka baryo, ang Mabolo diin duna silay mga pamaagi nga dili sama sa sinug sa Basilica. Ang sinug nga gipadayon ni Nang Titang Diola mao ang panagsangka sa moros ug kristiyanos ug dayon ang pagyukbo ug paghalad sa sayaw atubangan sa imahen sa Santo Nino.

Adunay laing matang sa Sinulog nga mismo nag-una sa Siyudad sa Sugbo. Mao kini ang Sinulog sa Carmen nga nagsugod ubos sa liderato ug inspirasyon ni Padre Jose Motus. Atong kahinumduman nga si anhing Padre Jose Motus usa sa mga gidala ni kanhi Arsobispo Gabriel Reyes, ug iyang sekretaryo panahon sa ikaduhang gubat sa kalibutan. Si Padre Motus misugod niini sa iyang parokya sa Carmen didto sa Norte sa Sugbo. Si Padre Motus suheto sa Ati-Atihan nga mao usab ang sayaw pasidungog kang Senor Santo Nino didto sa Aklan diin siya nagagikan. Mao nga kon dunay moingon nga nag-una ang maong Sinulog sa Carmen husto kana.

Dinhi atong makita ang paglambo o development sa usa ka balansayon or practices. Ang kultura dili static kondili dynamic. Kini kanunay’ng abli sa kalambuan. Dili sirado ug nahuman. Busa atong kuhaon sa atong hunahuna nga ang mga practices nato nga gihimo diha nang daan. Kining atong makita karon sa atong dakbayan niagi ug daghang kalamboan. Bisan gani sa natad sa relihiyon. Para kanako ang importante kon tinud-anay ba kita sa atong pagdebosyon. Dili ba kaha kita nagpagawal lang. Kusog moisa sa larawan sa Senyor pero kusug sad mangawat. Kusog moisa sa larawan sa Senyor apan mosuporta ug patay nga wa diri wa didto. Kusog moisa sa larawan apan tikasan ug timbangan. Ang pagdebosyon unta sa Santo Nino magdala kanato sa kalamboan dili lamang sa manggad kondili sa mga taras ug batasan usab. Hinaut nga sa atong pagsiyagit ug Viva Pit Senyor dunay usa ka aspeto ang nabag-o sa atong pagkatawo karong tuig 2026. Malipayong Pista Senyor Kanatong Tanan! Viva Pit Senyor!