Santo Niño de Cebu

Adunay mga scholars o mga magtotoon nga nagsulat mahitungod sa kasaysayan sa Santo Nino nga nanagsumpaki bahin sa detalye sa pagkakaplag niini. Ang usa sa ilang mga pangutana kon diin man gyud kini gikan nga imahen. Dunay moingon nga kining maong larawan dili gikan sa Europa sumala mga scholars nga may pagka nasyonalista ang panglantaw. May moingon usab nga mao gyud kini mismo ang larawan nga gidala ni Magallanes dinhi sa Sugbo sa iyang pagbiyahe sa kadagatan paingon sa Isla sa Moluccas or Spice Island. Sa tinuod nga pagkasulti wala gyuy igong kapasikaran o ebidensya dokumental bahin sa gigikanan sa Santo Nino gikan ni Fernando Magallanes kini sumala sa usa ka historian nga si Christina H. Lee (Philippine Quarterly of Culture and Society 2017, p. 80)

Ang mga sulat ug dokumento nga maoy gibasehan sa mga magsusulat sa kasaysayan nagkadaiya sa ilang presentasyon tungod lagi tungod kay wala kitay makuptan nga original manuscripts. Hinoon, atong mabasa ang upat ka nagkalainlain nga bersyon nga kopya lamang sa orihinal nga angay tukion uban sa critical nga pagbasa. Dunay tulo ka French version ug usa ka Italian. Ang saysay ni Pigafetta usahay magbangi sa ilang presentasyon ug interpretasyon. Mao nga lisud isulti kon mao na ba gyud ni ang tinuod ug definitibo. Wala man sila moingon nga dili konektado apan lisud isulti sa categorical nga paagi kay ang historiador kanunay mogamit sa himan sa ebidensya ug dili sa unsay gibati lamang.

Tungod lagi kay dunay upat ka bersyon sa maong diskurso, natural lang nga dunay gagmay’ng panagbangi sa detalye sama pananglit kon aduna ba gyud gihatag nga larawan nga Santo Nino? Sa usa ka bersyon adunay Santo Nino nga gihatag si Magallanes ug dunay hisgot sa Krus. Sa ikaduha, ang larawan sa Birhen lamang ang gihusgutan nga nagkupot ug bata ug adunay krus usab ug mao nga ang pangutana karon nga unsa man gyud ang tinuod niini, kang kinsang bersyon ang angay nga dawaton? Nigula kining maong tipo sa mga pangutana karon tungod kay may mga tawo man lagi nga niangkon nga dili European ang origin sa Santo Nino apan kini gikan gyud sa Sugbo nga gipasidunggan na ug giludhan sa karaang mga tawo. Mao nga balik sa pangutana kon kang Magellan ba gyud gikan kini.

Hinoon, ang dili malalis nga aspeto sa kasaysayan bahin sa Santo Nino mao ang pagkakaplag niini dili ang pagdala. Klaro man ang dokumento mahitungod sa iyang pagkakaplag tungod sa deposisyon nga gihimo sa mga saksi labi na ni Juan Camus nga mao ang nakakaplag sa maong imahen sulod sa balay nga nasunog. Kining dokumento nasuwat ug may kopya niini didto sa Archivo sa mga Agustino sa Valladolid, Spain diin may oportunidad ako nga nakakita mismo sa maong dokumento sa akong pagbisita Valladolid niadtong tuig 2015.

Ang duha ka diskurso bahin sa gigikanan sa Santo Nino tinuod makahatag ug kalibog ug pagduda kon tinuod ang atong mga gitoohan kaniadto sa wala pa kita magtoon sa kasaysayan ug dokumento. Apan usahay nindot nga timbangon ang mga butang nga may kalabutan sa atong pagtoo. Tinuod dili nato makita ug makonektar sa saysay ang kamatuoran sa gigikanan sa maong larawan. Apan daghan man usab kita ug mga sulat ebidensya mahitungod sa pagkakaplag niini nga nakahimo ug kausaban sa mga katawhan tugod sa ilang debosyon. Kini nagpakita lang nga dunay mga butang nga hawa sa atong sentido ug kasinatian apan nakapabuhi sa atong pagtoo ug kalamboan nga espirituhanon. Dili ikalimod nga ang katawhan nga nangita ug kahulugan sa maong larawan nakakaplag ug kaayohan sa kalag ug sa lawas.