MENSAHE SA PASKO SA ARSOBISPO SA SUGBU

Mga Hinigugma,

Sa atong pagsaulog sa Pasko sa Pagkatawo sa atong Ginoong Jesucristo, giawhag na usab kita sa pagduaw pagbalik sa maanindot nga talan-awon sa Belen: ang bag-ong gianak nga Manluluwas nga giputos sa panapton ug gipahiluna sa pasongan, uban ang iyang Inahan nga Ulay nga si Maria ug ang iyang ama-ama nga si Jose. Kining makatandog nga eksena sa Belen nagpahinumdom kanato unsa kayano ang pag-abot sa atong Dios nga Manunubos: dili sa makabungog nga huni sa tambol ug sa trumpeta apan sa kahilom sa kagabhion; dili diha sa usa ka harianon nga palasyo, apan sa suok nga silonganan sa mga mananap; ug dili sa hamugaway nga higdaanan, apan sa usa ka pasongan.

Nagdungag sa kayano sa talan-awon sa Belen ang mga magbalantay sa karnero, nga maoy mga unang gisangyawan sa Pagkatawo sa Ginoo. Buot nako silang itanyag kaninyo isip atong sumbanan sa atong pagsaulog ug pagpuyo sa Pasko karong tuiga.

Atol sa pagkahimugso sa atong Manunubos, kining mga magbalantay nagtukaw nga nagbantay sa panon sa mga karnero. Diha sa ilang pagtukaw, gipadayag kanila ang “maayong balita sa dakong kalipay alang sa tanang katawhan,” (Lk 2,8-12)—ang pagkatawo sa Manluluwas nga mao si Jesus, ang Dios nga nagpakatawo.

Nindot kini nga pahinumdom kanato nga sila nga mga nagtukaw—ang mga matuohon nga maigmat sa presensya sa Dios sa ilang taliwala—mao kadto ang maantigo moila nga ang diwa ug ang sentro sa Pasko mao ang Maayong Balita sa pagkatawo sa Manunubos nga tinubdan sa dakong kalipay alang sa tanang katawhan ug tinubdan sa tinud-anay nga paglaom sa matag usa.

Ang mga magbalantay, human makadawat sa sibya sa mga anghel, misugod dayon paglakat aron pagsuta sa kamatinud-anon sa mensahe nga ilang nadawat: “Mangadto kita karon sa Betlehem ug atong tan-awon ang panghitabo nga gipadayag kanato sa Ginoo. Ug nagdali sila pag-adto…” (Lk 2, 15-16).

Kining mga magbalantay nga nakadawat sa Maayong Balita sa dakong kalipay nahimo nga mga Magpapanaw nga sa walay paglangan misugod sa usa ka panaw paingon sa Manluluwas nga ilang gipaabot. Kita gihagit nga mahisama kanila, nga sa walay paglangan mohimo unta kita sa desisyon sa pagsugod sa paglakat paduol sa Ginoo nga maghatag kanato sa tinud-anay nga kalipay niining atong kinabuhi.

“Sa pagkakita nila niini, ilang gitaho ang ilang nadungog bahin niining bataa,” (Lk 2,17). Ang yano nga mga magbalantay nga sa ilang pagtukaw nahimo nga magpapanaw paingon sa Manluluwas nga gilauman sa ilang katawhan, nahimo usab nga mga saksi nga nagsangyaw sa Maayong Balita human nila hikaplagi ang balaang bata sumala sa gipahibalo kanila. Sila mipaambit niini sa uban tungod kay ang dakong kalipay alang man sa tanang katawhan, usa ka kamatuoran nga angayang isibya sa uban ug dili kay tipigan sa kaugalingon lamang.

Isip mga matuohon nga gitawag nga mamahimong Pilgrims of Hope niining Jubilee Year 2025, giawhag kita nga mahisama niining yano nga mga magbalantay sa karnero: sa kanunay magtukaw ug magmaigmat kita, kay niining paagiha lamang madawat ug masabtan nato ang Maayong Balita sa Dakong Kalipay nga mao si Jesus mismo, ang Dios nga nagpakatawo alang kanato; nga magmadasigon kita sa panaw ug dili maglangan pagsugod pagpuyo niining hagit sa pagpahiuyon sa kinabuhi sumala sa plano sa Dios; nga human makakita, human mohamtong sa pagtuo tungod sa pagsinati sa katinuod sa Dios nga atong nahimamat diha sa panaw, mahimo unta kitang mga saksi nga nagsangyaw ug nagpaambit niining kasinatian sa dakong kalipay tungod kay ang atong nakaplagan nga Manunubos sa atong kinabuhi, naghagit man kanato nga ipaambit sa uban ang atong kasinatian sa pagkakaplag kaniya, ug sa maong paagi, makakaplag usab ang uban kaniya ug makasinati sa kalipay nga iyang gitanyag sa tanan.

Sa atong pagsaulog sa Pasko, mahisama unta kita niining mga magbalantay nga wala maglangan paglakat paingon sa Dios nga nagpakatawo, ug unta sa atong paghimamat kaniya masibya ug madala nato Siya ngadto sa uban isip gasa nga labing mahinungdanon karong Pasko.

Malipayong Pasko kanatong tanan!

[SGD.] MOST REV. JOSE S. PALMA, D.D.
Arsobispo sa Sugbo