Unsaon Paglaum ug Pag-ayo?

Salamat sa Diyos, 2025 nahuman na! Usa kadto ka gubot nga tuig, punô sa mga kaguliyang ug kawalay kasigurohan – nakasinati ta og linog nga miigo sa Amihanan; mga bagyo (Tino, Uwan, Wilma) nga nagdala’g dili maayong mga baha; politikanhong kaguliyang nga nakapadismaya o nakapaluya sa mga magbubuhis ug nakapahadlok sa mga langyaw nga tigpamuhonan sa negosyo. Ang mga pag-antos sa atong mga hinigugma dili gayud malimod. Apan bisan pa niini, ang mga pulong ni San Pedro, “Andam kanunay sa paghatag og rason sa imong paglaum” (1 Pedro 3:15) may kalabutan sa pag-abli sa atong tuig 2026. Kini ang tinuod nga panawagan sa Ginoo alang kanatong tanan. Kini ang nagpuwersa kanato sa tinuod nga pagpangutana sa atong kaugalingon, “nganong naglaum pa ko?”, “unsa may akong gipaabot niining 2026?”

Akong nasabtan nga kini nga mga pangutana dili sayon tugkaron apan palihug tugoti ko sa pagtanyag sa usa ka potensyal nga punto sa pagsugod ug kini ang mga pulong sa atong Ginoo sa Mt. 11: 29, “Pagkat-on gikan kanako kay ako maaghop ug mapaubsanon sa kasingkasing.” Kini nga pagdapit gikan sa atong Ginoo nga mahisama kaniya, ang pagkamapaubsanon sa kasingkasing mahimong usa ka maayong punto sa pagsugod aron ibutang ang atong mga layag padulong sa atong panaw sa paglaum. Ngano? Kay kasagaran, morag napugos kita sa pagpaubos diha sa kaulawan. Ang bantugan, si St. Teresa of Avila miingon, “walay pagpaubos nga walay pagpakaulaw.”

Giingon nga ang pagpakaulaw mao ang bisan unsang porma sa kadaot nga kinahanglan natong mabawi. Ang usa ka panghitabo sa kinabuhi o usa ka tawo mahimong magpakaulaw kanato pinaagi sa paggamit sa gahom labaw kanato aron kita mobati nga gamay, dili kaayo importante o nga kita mahimong mas ubos kay sa kung kinsa kita sa tinuod. Makaingon ba ta nga ang atong kasamtangang mga kalisdanan, mga kadaot ug sangputanan sa mga kalamidad, nagkahuyang nga politikanhon ug ekonomikanhong kalig-on sa atong nasud, ug bisan ang atong personal nga mahagitong mga problema mao ang “pagpakaulaw” nga maoy makapahimo kanatong mapaubsanon? Makahatag ba sila kanato og abilidad sa pagsuta sa atong kaugalingon sa matinud-anong paagi? Giingon nga kung magmalampuson kita sa pagsanong sa tawag sa pagpaubos, wala na nato tan-awa ang atong kaugalingon nga mas maayo o mas grabe ka ubos sa tinuod natong pagkatawo. Kini nagdala kanato sa pag-angkon pag-usab sa matinud-anong hinungdan kung kinsa kita. Kita ang mga hinigugma sa Diyos!

Ang pagkamapaubsanon nahimong positibo nga pasilidad nga nagtugot kanato sa pagdawat sa mga grasya sa Diyos aron mahimo silang molihok sa atong kinabuhi ug sa kinabuhi sa atong gihigugma. Uban sa pagpaubos, adunay paglaum, tungod kay ang paglaum mao ang hiyas gikan sa Diyos diin kita masaligon nga nagpaabot sa hingpit nga kalipay sa langit ug sa mga panabang sa Diyos dinhi sa yuta. Kini, tim-us nga giproklamar ni San Pablo, “nangmasigarbuhon usab kita sa atong mga pag-antos, nahibaw-an nga ang pag-antos nagbunga’g kinaiya, ug ang kinaiya nagbunga’g paglaum, ug ang paglaum dili mopakyas kanato, tungod kay ang gugma sa Ginoo gibubô sa atong mga kasingkasing pinaagi sa Balaang Espiritu nga gihatag kanato” (Gal. 5:3-5).

Sa atong pagsugod sa bag-ong tuig, mapaubsanon natong pangayuon sa Balaang Espiritu sa paghatag kanato sa grasya nga mahimong vulnerable diha ni Kristo nga nagpakita sa Iyang kaugalingong vulnerability sa konkretong paghigugma ug walay hunong nga pagluwas kanato. Ang pagka-vulnerable dili lamang ang atong pagkadaling madani sa bisan unsang kadaot apan sa kinahiladman, kini ang atong labing dakong matang sa kusog.
Si Fr. Henri Nouwen nagtuo nga adunay nindot nga mahitabo kung ang atong vulnerability maghiusa sa vulnerability ni Kristo. “Nagpuyo kita sa usa ka kalibutan nga nagsugyot nga ang ubang tawo kusgan ug ang uban huyang, o ang ubang tawo aduna niining duha ug ang uban wala. Ug kadtong kusgan kinahanglan nga motabang sa mga huyang. Apan dili kana ang gisulti sa ebanghelyo. Kini iya sa sentro sa ebanghelyo nga ang Diyos nahimong vulnerable. Nga gihukasan sa Diyos ang iyang kaugalingon gikan sa gahom. Nga wala Niya gihuptan ang iyang pagkaparehas sa Diyos, apan gihaw-as ang iyang kaugalingon ug nahimong usa ka tawo nga sama kanato. Isip mga sumusunod ni Hesus, ang atong ikatanyag mao una sa tanan ang atong pagka-vulnerable. Ang atong kaugalingong mga kahuyang, ang atong kaugalingong pagkabuak, ang atong kaugalingong mga samad. Ang atong mga samad mahimo lamang nga tinubdan sa kahupayan para sa uban kung kita mag-atiman sa atong mga samad, kung atong bandahi-an kini pag-ayo uban sa atong kaandam sa paghimo sa usa ka panag-uban sa mga mahuyang ug pagsalig nga didto, ang gahom sa Ginoo sa pag-ayo mahimong makita.” Hinaot nga ang atong bag-ong tuig mapunô sa paglaum ug kahupayan!