Ang Tabay Diin Akong Nakaplagan ang Hingpit nga Gugma sa Diyos

Ang gugma panagsa rang makita diha sa dagkong mga lihok. Kasagaran, kini madiskobrehan sa hilom nga pag-ampo, malumong mga pulong, ug ang pagpili nga magpabiling maayo bisan sa kasakit.

Sa akong panaw uban sa akong anak nga si Aries, akong naamgohan nga ang ordinaryong mga kahigayonang akong nataligam-an kaniadto nahimong mga dapit diin akong nakaplagan ang gugma. Ang iyang mapasalamatong kasingkasing wala gayud mapakyas sa paghunghong, “Salamat, Hesus,” bisan human sa yanong pagsakay og jeep. Diha sa iyang batang pagtuo, ang Ginoo hinayhinay’ng mipahiuli kanako kang Kristo ug misugod sa pagpaayo sa usa ka kasingkasing nga nasamdan ug mipahilayô.

Ang sugilanon sa Samaritanhong babaye sa Tabay ni Hakob (Juan 4:1–42) nagpahinumdom kanakong kitang tanan nagdala’g tinagong mga samad. Naabot siya’ng nangita’g tubig, apan ubos sa iyang adlaw-adlaw’ng buluhaton mao ang mas lawom nga kauhaw—ang gitinguhang makit-an, higugmaon, ug mahiusa. Si Hesus, ang Hingpit nga Gugma, wala magsugod sa pagkondenar. Nahimamat Niya siya kung asa siya, nagsulti sa kamatuoran uban ang kalooy, ug gitanyag kaniya ang buhing tubig nga nagtagbaw sa kinahiladmang kauhaw.

Tingali kitang tanan sama sa babayeng Samaritanhon. Mianhi kita sa atong kaugalingong mga tabay’ng nagdala’g kasubô, kasagmuyô, pagmahay, ug mga samad nga ang Diyos lamang ang hingpit nga nakatugkad. Ako, usab, nakakaplag sa akong kaugalingong nagbarog sa maong tabay. Ang imbitasyon sa pagpasaylo wala moabot tungod kay ang kasakit nahanaw. Miabot kini tungod kay malumong gipakita kanako ni Kristo nga ang pagpasaylo kabahin sa pagkaayo. Ang pagpasaylo wala makapapas sa kasakit. Hinuon, kini nagpalu-ag sa hugot nga pagkupot sa kasakit ug naghatag og luna sa kalinaw sa Diyos.

Ang psychologist, Dr. Everett L. Worthington, Jr. (2004) nipatin-aw nga ang tinuod nga pagpasaylo nalangkit sa ubos nga kabalaka, depresyon, kasukô, ug stress samtang nagpalambo sa emosyonal ug relasyonal nga kaayohan. Ang pagpasaylo dili lamang usa ka moral nga sugo; kini usab usa ka dalan padulong sa kaayohan. Dugay na sa wala pa gipamatud-an sa sikolohiya ang mga kaayohan niini, giproklamar ni San Juan Vianney ang walay kinutoban nga kalooy sa Diyos, “Ang atong mga kasaypanan sama sa mga lugas sa balas tupad sa dakong bukid sa kalooy sa Ginoo”. Ang pagsalig nianang kalooy naghatag kanako’g kaisog sa paghatag niini ngadto sa uban, usa ka pag-ampo matag higayon.

Sa paghinumdom, akong nakita nga si Kristo naghulat ra diay sa akong kaugalingong tabay sa tanang panahon. Ako Siyang nahimamat pinaagi ni Aries, pinaagi sa kaayo sa mga tawo’ng nitabang kanako, ug sa dili maihap nga ordinaryong mga higayong nagpahiuli sa akong pagtuo. Wala gyud siya magdali sa akong pagkaayo.

Sa matag higayong mopili kita sa pagpasaylo, mobalik kita sa tabay diin si Kristo mapailubong naghulat kanato. Wala Siya mosaad og kinabuhing walay samad, apan nagtanyag Siya’g buhing tubig nga nagbag-o kanato ngadto sa dapit diin ang Iyang grasya midagayday. Sa katapusan, akong naamgohan nga ang tabay’ng akong gipangita dili gayud usa ka dapit kondili usa ka matinud-anong tawo. Pinaagi sa usa ka batang lalaki nga wala gayud makalimot sa pag-ingon, “Salamat, Hesus,” akong nakaplagan ang hingpit nga Gugma sa Diyos.

Reference:
Worthington, E. L., & Scherer, M. (2004). Forgiveness is an emotion-focused coping strategy that can reduce health risks and promote health resilience: theory, review, and hypotheses. Psychology & Health, 19(3), 385–405. https://doi.org/10.1080/0887044042000196674