Nakasayaw Naba Ka Kutob sa Imong Mahimo?

Kung ikaw usa ka hayop, unsa ka ug ngano? Kung ako pangutan-on, tingali ang akong tubag, usa ako ka agila. Tingali mopili ko’g mananap nga nagpakita’g gahom, kaabtik, ug kadaugan. Apan sa paglabay sa katuigan, ang mga tawo nausab ug mao usab ako.

Sa kasamtangan, nagsul-ob ko’g bao nga pendant. Isip usa ka practicing psychologist, akong nahimamat ug gitagad ang mga nakasinati’g kabalaka, depresyon, isyu sa pagdumala sa kasukô ug uban pang kasamok sa pamatasan. Kini nga kahimtang nagdala’g walay kasigurohan ug kadaot. Ang bao nga pendant nagpahinumdom nga okay rang maghinayhinay basta maningkamot kanunay. Nga sa takdang panahon, makaabot ra ta sa atong padulngan. Sa kinabuhi, okay ra mohunong, moginhawa, ug mopahulay. Makakat-on kita’g pagtulon-an gikan sa bao. Kaugalingong dagan, kaugalingong panahon. Hinaot nga madasig kita’g gamay’ng pagsalig sa bao, nga daw walay hunahuna sa dagan sa kinabuhi sa uban.

Adunay mga sumbanan sa panghunahuna nga nakagamot sa utok. Kini ang mga script sa kinabuhi nga nitidlom sa kinahiladman. “Walay pag-atras, walay pagsurender. Ang mga mananaog dili gayud moundang. Kini tanan mahitungod sa kadaugan.” Kining mga sumbanan sa panghunahuna mahimong modiktar sa atong lihok ug estratehiya sa kinabuhi. Kini lagmit nga makapalambo sa neurotic nga panginahanglan alang sa pag-validate gikan sa uban, dili maayo ug dili matinud-anong gilauman sa kaugalingon. Mahinungdanon kaayo ang atong kagahapon kon kinsa kita karon. Apan dili na nato mausab ang nangagi. Bisan pa, mahimo nato, sugod karon nga mohimo’g kabag-ohan sa hunahuna ug buhat.

Unsa kaha kung nahadlok ka ug gikapoy? Pahulay. Walay daotan sa pagkamatinud-anon sa imong gibati. Kung nakapahulay ka, mahimo nimong i-stratehiya kung unsa ang sunod buhaton. Ang uban nagtan-aw sa kinabuhi isip usa ka padayong lumba sa ubang tawo. Apan unsa alang kanimo ang hulagway sa kalampusan? Nagkalain-laing lakang alang sa nagkadaiyang mga tawo. Kinahanglan ka bang magmadaugon sa tanang panahon? Nakita ba nimo nga sa matag dula, ang tanan modaog? Ang reyalidad sa kinabuhi kay naay daog ug naay puy pildi. Ang bugtong butang nga atong kontrolado mao ang atong pagpaningkamot. Buhata ang labing maayong mahimo nimo, kana ra ang imong mahimo sa kini nga pagpangita sa kadaugan aron makadawat og pahalipay.

Unsa imong gusto? Kung makuha nimo ang imong gusto, unsa gyud ang imong makuha? Unsa may imong gibuhat aron makuha ang imong gusto? Na-stress ka ba sa tanan niining mga pangandoy ug ambisyon sa kinabuhi? Ang ubang butang sa kinabuhi angayang maangkon. Apan angayan ba sila? Makahatag ba gyud kini nimo’g kalipay? Naka-focus ba ka sa tanan nimong katuyoan aron makadaog nga wala madani sa pagsubay sa mga butang nga labaw pa sa kalibutanong mga kabtangan ug pagdayeg gikan sa katilingban? Nakasayaw naba ka kutob sa imong mahimo?

Ang kinabuhi sama sa usa ka sayaw. Mga lihok nga nahiuyon sa ritmo, punô sa grasya ug katuyoan. Mahimo ba kamong motubag niini, “Aduna bay kidlat sa kalipay sa mga lihok sa kinabuhi nga imong gihimo?” Hunong. Pamalandong. Sayaw pag-usab. Niining higayona, ang pagpaminaw sa ritmo, ingon ka matahom kutob sa imong mahimo, sayaw sa kinabuhi nga adunay katuyoan.