Tinago ug Bililhong Bahandi

Mga igsuon ko diha ni Cristo, karong domingoha nagpadayon si Cristo sa pagpasabot ngadto sa mga katawhan mahitungod sa tinuoray na bili ug kantidad sa Gingharian sa Dios pinaagi sa mga sambingay. Sa atong pagbasa sa Ebanghelyo karon sumala ni San Mateo, tulo ka mga sambingay ang atong mapalandongan ug maayo kung atong matagsa-tagsa og hisgot ang kahulugan ug kalambigitan niini alang kanatong mga matutuo.

Una, ang sambingay bahin sa natagong bahandi. Sa sambingay, adunay usa ka tawo na nakakaplag og bahandi na gilubong sa usa ka uma. Gibaligya niya ang tanang niya katigayunan ug gipalit ang uma aron maangkon ang maong bahandi. Ang Gingharian sa Dios sama sa maong bahandhi na nakalubong ug dili tataw sa tanan. Pipila lamang ang nasayod niini ug andam silang ibaligya ang tanan alang niini kay nasayod sila nga ang bili niini dili gayud matupngan sa tanang butang nga atong mapundok diri sa kalibutan. Gipili nila ang labing maayong bahin.

Ika-duha, ang sambingay bahin sa perlas. Ang Gingharian sa Dios sama sa bililhong perlas nga nakaplagan sa negosyante. Malipayon kaayo siya niini nga andam siyang ibaligya ang tanan niyang kabtangan. Matud pa ni Santo Tomas de Villanueva, ang tawo nga nanag-iya niini adunahan, bisan pa kon wala na siyay lain nga butang. Ug ang tawo nga wala niini kabus, bisan pa kon anaa kaniya ang uban pang butang.

Apan makaguol nga mapalangdongan nga dili tanan ang makabuhat niini. Lisod kaayo ang pagpugos sa usa ka tawo, bisan sa atong kaugalingon nga, nga mahigugma labaw pa sa sukod sa iyang kapasidad sa pagpili ug paghigugma. Mao nga nagdapit si Jesus kanato sa kausaban diin mamahimong posible ang maong pagpili sa Gingharian sa Dios. Mahimo kining pagsanong pinaagi sa pag-ila sa tinuoray nga bili sa iyang gisaad nga kaluwasan, pagbiya sa mga butang nga nakapadaut kanato ug nakapabuta kanato sa maayong sugo sa Ginoo, ug pagbalik sa Ginoo human nato nga masilayan na dili makapatagbaw ang mga kalibutanong butang lamang.

Dugang pa, tungod kay naghisgot man kita ug bahandi, angay pud nato hisgotan na kon diin adunay bahandi, adunay puy kapeligrohan sa mga kawatan nga mosulay sa pagpangawat niini. Busa, mga igsuon, kon hatagan na kita og higayon nga makadawat og usa ka butang nga kabililhon sama sa Gingharian sa Dios, magdahom gayud kita na ang hagit sa kinabuhi mangabot gayud. Kinahanglan na ato kining ampingan pag-ayo gayud. Karon tungod diay sa bili niini, makasabot na kita kung ngano nagpadayon ang mga pagtintal sa dautan na buot mupalayo kanato sa Gingharian sa Ginoo.

Ika-tulo ug isip panapos, ang sambingay bahin sa pukot. Kini nagpatin-aw sa lungtad nga pagkauban sa maayo ug daotan niining kalibutana. Apan kini naghulagway usab sa kataposang pagbulag sa mga matarong nga nakapili sa Gingharian sa Dios gikan sa mga daotan nga nagdumili niini hangtod sa kataposan sa panahon. Ang tawo sa umahan ug ang negosyante usa lamang ba ka hilayo nga panig-ingnan alang kanato? O mahimo ba sila nga atong masunod ug masundog?