Dili unta Damgo lang

Mga igsuon ko diha ni Kristo, ang atong ebanghelyo karong Domingoha sumpay sa Ebanghelyo sa miaging Domingo diin si Jesus naglatid sa walo ka mga Kabulahanan o sa “Beatitudes,” ang mga saad Niya sa katawhan nga tinuod na makadawat sa mga ganti sa Ginoo, ang Gingharian sa Langit ug maingon na mga anak sa Dios.

Niining bahina sa Ebanghelyo karon, nag-awhag si Jesus diha sa iyang mga tinun-an nga mamahimong asin ug kahayag sa kalibutan. Pagdapit kini kanila na mamahimo untang buhi ug dayag ang mga Kabulahanan diha sa ilang tagsa-tagsa ka kinabuhi, ug sa ingon, sila magdala og kalipay ug kalinaw sa uban, kalipay na nagatubod gikan sa Ginoo ug kalinaw na mabati diha sa Iyang presensya. Dili lang unta magpabiling tumong ug tumong lang ang mga pulong ug mga saad ni Hesus kundili atong untang kab-uton gayod, uban pagpaningkamot ug kadasig, ang kinabuhing iyang gilatad alang kanatong andam na musunod Kaniya. Dili unta mahisama sa liriko sa kanta na nagkanayon, “Matuman man, apan sa damgo lang.” Kita mga buhing Kristyano tungod kay atong gihatagan og kahigayunan si Kristo nga magpuyo diha kanato ug maghatag og kinabuhi sa atong tibuok nga pagkatawo.

Ug unsa may mga possibleng babag sa maong pagkinabuhing Kristohanon? Possibleng kahadlok, kahasol, kalisdanan, kasamok ug uban. Mao nagpasidaan si Jesus na ang maong sulogoon na wala magbuhat sa ingon daw asin na walay lasa. Kini walay gamit ug kapuslanan. Unta ang atong pulong Kristohanon, ang atong lakang Kristohanon usab.

Mga igsuon, sa atong tawhanon na kinaiya gani, ang atong mga kusog ug mga paningkamot nagtinguha nga makakaplag og kadangpan sa kalibutan—direksiyon, dapit nga angay nilang padulngan, kapuy-an. Nangandoy kita nga magbilin og timaan sa kalibutan nga atong gipuy-an—usa ka pagpahayag sa atong kaugalingon nga atong gipili nga ipinta ug ibilin sa kanbas nga mao ang kinabuhi. Mulihok kita alang sa atong gihigugma, banay, ug arong mapatukod ang dapit diin sila magpuyo na malipayon ug malinawon. Isip mga anak sa Dios, kita usab gitawag sa pagtukod sa Iyang gingharian diri sa kalibutan pinaagi sa pagbuhat atong mga Kristonhanong katungdanan. Mao migamit ang Ginoo og mga ordinaryong mga butang alang sa pagpasabot niining iyang tahas alang kanato: asin ug kahayag.

Ug unsa man kining mga tahas nato? Sama sa asin nga nagapreserba, nagahatag og lami, ug nagapakita sa kaanindot sa ubang mga lami, kita usab gitawag sa pagpreserba, pagdugang, ug pagpadayag sa balaang kaayohan sa Dios dinhi sa kalibutan nga atong gipuy-an. Sama sa kahayag nga nagapadayag sa mga kolor sa mga butang ug nagatugot kanato nga makita ang kahapsay sa mga butang sulod sa usa ka lawak—pananglitan, aron atong makit-an ang atong dalan sa sulod niini—kita usab giimbitar sa pagpadayag sa balaang kaayohan sa Dios diha sa kinabuhi sa uban, sa pagpasabot kung giunsa sa Dios paghan-ay ang iyang binuhat, ug sa paggiya sa mga tawo sa ilang pagpanaw sa kinabuhi, nga usa ka gasa gikan sa Dios.

Ang gingharian sa Langit saad na tinuod na dili lang kutob sa damgo ilabina kung mag-uban kitang tanan sa pagbuhat atong katungdanan ug sa pagtukod niining lungsod na balaan. Mao bangon, mga asin ug kahayag!