Ang Gasa sa Kaluwasan

Niining ika-kawhaan nga Domingo sa yanong panahon, masapyaw nato karon nga ang kaluwasan gasa gikan sa Dios alang sa tanan. Kining maong gasa sa kaluwasan gitanyag dili lamang niadtong mga takus, apan tungod kay ang Dios maloloy-on ug ang atong kasingkasing matugob sa pagtuo ug pagsalig kaniya. Gani diha sa unang pagbasa nato karon, si Propeta Isaias nagtudlo sa katawhan nga ang balay sa Dios alang sa tanang katawhan. Pasabot, nga sila nga dili sakop sa Balay sa Dios apan nagpuyo sa kinabuhi sa pagtuo, pagkamasulondon sa Dios, hangpon ug makaangkon gayud sa samang gasa sa kaluwasan. Si San Pablo, sa iyang sulat alang sa katawhan sa Roma, nagtudlo kanila nga bisan ang mga Judiyo nga wala mutuo kang Jesus, ang Dios nagdalit gihapon sa iyang kaluoy alang kanilang mga langyaw.

Sa samang pagkaagi, nagsaysay kanato ang ebanghelyo nga si Jesus miadto sa dapit sa Tiro ug Sidon. Didto miduol Kaniya ang usa ka babaye nga taga Canaan nga dili Judio. Alang sa mga Judiyo, siya usa ka langyaw nga walay labot sa piniling katawhan. Miduol kining maong taga Canaan isip usa ka inahan nga nanghangyo og pakitabang alang sa iyang anak nga giyawaan. Pinaagi niining maong Inahan nga taga Cana, atong makita ang mga bakho sa mga Inahan alang sa ilang mga anak nga nagkinahanglan gayud og panabang. This is not only a cry from a Canaanite needing help, nor a cry of an Israelite mother seeking for help from a savior for healing of a beloved. But this is also a universal cry for healing. Miduol siya kang Jesus ug misinggit: “Ginoo, Anak ni David, kaloy-i ako!” Makapatingala ang nahitabo: sa sinugdanan, daw wala motubag si Jesus kaniya. Ug bisan pa, wala moundang sa pagpangayo og tabang ang babaye. Gipasabot ni Jesus nga ang Iyang misyon alang sa mga nawala nga karnero sa balay sa Israel. Apan mitubag ang babaye uban sa dakong pagpaubos: “Bisan gani ang mga iro mokaon man sa mga mumho nga mahulog gikan sa lamesa sa ilang mga agalon.”Dinhi gipakita sa babaye ang usa ka talagsaong pagtuo. Nagpaubos siya, nagpadayon, ug misalig. Busa miingon si Jesus: “Babaye, dako ang imong pagtuo! Matuman ang imong pangandoy.” Ug naayo ang iyang anak niadtong taknaa.

Masapyaw nato dinhi karon ang tulo ka mga pagtulon-an alang sa atong kalamboan sa pagtuo:

Una, ang grasya sa Dios wala’y utlanan. Si Jesus miadto sa teritoryo sa mga dili Judio. Didto Iyang gipakita nga ang plano sa Dios alang sa kaluwasan dili matapos sa usa lamang ka katawhan. Ang babaye nga taga-Canaan nahimong timaan nga moabot ang panahon nga ang tanang katawhan pagadawaton ngadto sa kaluwasan pinaagi kang Kristo. Mao kini ang dakong misyon kanatong tanan isip simbahan: ang pagkabig sa tanan balik kang Kristo. Mao nga kon ang Ginoo andam modawat sa usa ka makasasala nga mobalik Kaniya, kinsa man kita aron mobabag sa pultahan? Ang Simbahan usa ka panimalay alang sa mga nangita sa Dios, alang sa mga nasakitan, alang sa mga nahisalaag, ug alang sa mga gustong makabalik.

Ikaduha, dili nato maangkon ang kaluwasan tungod lamang sa atong ngalan, katungdanan, relihiyon, o pagkaaktibo sa simbahan. Ang tanan niini importante, apan ang Ginoo nangita usab sa kinahiladman sa atong kasingkasing nga motuo ug mosalig Kaniya. Ang pagtuo sa mahimong sumbanan alang kanato’ng mga Kristiyanos. Pagtuo nga nagmalungtaron dili lamang diha sa kaharuhay, bisan pa sa kagidlay ug pagkasinalikway; pagtuo nga nagapadayon bisan sa kamingaw ug kaguol tungod sa mga gumunhap sa kinabuhi; pagtuo nga makanunayon bisan pa diha sa kawad-on ug kalisud. Ang babaye sa Ebanghelyo wala mohunong bisan wala siya tagda. Nagmalungtaron, nagpadayon ug nagmakanunayon siya.

Ikatulo, ang pagpaubos maoy dalan sa grasya. Ang babaye wala magpataas sa iyang kaugalingon. Ang iyang tubag kang Jesus, nagpadayag kanato sa dakong pagpaubos. Bulawanon kini nga pagtulon-an alang kanato. Usahay o kasagaran buot nato nga ang Dios mosunod sa atong gusto. Gusto nato nga ang atong pag-ampo mahatagan dayon og katumanan. Ang matuod nga pagtuo mao ang pagsalig sa kaalam ug gugma sa Dios.

Ang kaluwasan usa ka wala’y kinutobang gasa sa Dios, apan gitawag kita sa pagdawat niini diha sa pagtuo, pagkamalahutayon ug pagpaubos.