‘Double Standard,’ Dakong Sukwahi sa Kristohanong Kinabuhi

Medyo nagubot ang daghang mga tawo ilabi na sa social media sa dihang mikatap ang isyu kabahin sa pagsulod ni senador Imee Marcos sa Basilica Minore del Santo Niño nga naka-sleeveless na senina. Daghan ang natingala ug nakasaway sa maong panghitabo tungod kay hugot nga gipatuman sa basilica ang “dress code” sa buot mosulod aron mosimba, mag-ampo, o managkot sulod sa basilica. Gani, kon adunay dili motugma sa gipahibawo nga dress code, dili kini pasudlon sa mga guwardiya o pahulamon og tapis o kupo nga giandam sa mga personnel sa basilica aron lang makasulod ang mga tawo nga wala motugma sa dress code.

Daghan ang nanaway sa senador ngano nga nisulod gyud siya sa basilica bisan og wala mauyon sa dress code ang iyang senina. Daghan pud ang nanaway sa mga nagpatuman sa dress code nganong wala makabadlong ug makapasul-ob man lang og tapis sa senador aron patas ang tanan diha sa pagtuman sa balaod. Napahimug-atan ang nag-umido nga problema sa katilingban nga kining pabor-pabor sa pagpatuman sa mga balaod magamay man o madako. Nga kumo kay impluwensiyal, ilado, o adunahan, mahimo lang piyongon ang mata kon uganing adunay kalapasan nga nahimo gituyo man o wala gituyo.

Ang nakapasamot niining isyu mao nga nahitabo kini sa simbahan nga dili ikalimod kanunayng nagtudlo sa katawhan sa mga maayong hiyas sa hustisya ug katarong apan klaro kaayo nga wala makabarog sa gitudlo niining sitwasyona.

Dili lang niining sitwasyon o isyu sa ensaktong isuot nga senina sulod sa simbahan kining maong problemaha mogawas kondili anaa usab kini sa uban pang mga sitwasyon nga wala lang tagda sa mga hingtungdan kay basin maikog o mahadlok sa gahum ug impluwensiya niining mga tawhana. Ang nakasakit mao nga ang grabeng maapektohan ug maagrabyado niining sayop nga pamaagi (ang pagpabor sa mga gamhanan ug tinahod) kay way lain kondili ang mga kabus. Abi man nato ug ang Simbahan kay “Church of the poor.” Nganong makakita man kita og ingon niini nga sitwasyon diin ang mga kabus lisudlisuron apan ang mga gamhanan ug adunahan paboran? Kon naa pa tu si Jesus atong sitwasyona, tingale dili si Imee Marcos ang iyang kasab-an kondili ang iyang mga tinun-an sa simbahan nga iyang gitudloan ug gibinlan sa iyang misyon sa pagsangyaw sa maayong balita, kay wa man magkadimao na hinuon. Imbis mopabor sa kabus, adto hinuon sa gamahan; imbis sa ensakto, adto hinuon sa sayop; imbis nga badlongon ang nasayop, magpa-picture pa man hinuon; imbis nga angkonon nga adunay sayop, morason pa nga daw wala ray nahitabo nga iskandalo.