Ang Matuod nga Pagkahalangdon

Pit Senyor! Nagsangpit na usab kita są Balaan nga Bata, Ang Senyor Santo Niño. Masapyaw nato kining tinagsip nga mga pagtulon-an kabahin sa mensahe sa pagkahanlangdon sumala sa gilatid kanato sa mga basahon karon, ilabina diha sa ebanghelyo. Atong masapyaw nga ang tinuod nga kahalangdon dili ang gahum, dili ang dungog sa kalibutan, kondili ang pagkahiusa, pagkamapaubsanon, ug pagdawat sa usag usa isip mga anak sa Dios. Niining mga tinagsip nga mga punto, masapyaw nato ang matuod nga kahulogan sa pagkahalangdon.

Diha sa unang pagbasa, ang mensahe ni Propeta Isaias kabahin sa katawhan nga naglakaw sa kangitngit nakakitag dakung kahayag nagpunting kang Kristo nga mao ang matuod nga kahayag. Ang kahayag ni Kristo wala magpili. Hinonoa, nagdan-ag kini sa tanan diha sa iyang kalumo ug kalinaw. Busa, kung si Kristo ang atong kahayag, usa ra kita. Gihimo kitang usa bisan lainlain ang atong kahimtang, kultura, o kasinatian.

Si San Pablo nagtudlo sa katawhan sa Efeso nga gipili kita sa Dios, gipasaylo, ug gihimo nga Iyang mga anak pinaagi kang Kristo. Wala kita nagkahiusa tungod sa atong kusog, apan tungod sa grasya sa Dios. Gidawat kita isip iyaha diha sa gugma pinangi ni Kristo sumala sa kabubut-on sa Dios.

Diha sa ebanghelyo masabtan nato nga lahi gayud ang panghunahuna sa Dios tali sa mga tawo. Gitudloan unta ni Jesus ang iyang mga tinun-an nga ang Anak sa Tawo itugyan unya sa kamot sa mga tawo aron patyon. Apan sulod sa tulo ka adlaw, siya mabanhaw. Nakapatingala kini sa mga tinun-an ni Jesus sanglit sukwahi man kini sa ilang panabot kabahin sa usa ka Mesiyas nga ilang giila nga Halangdon. Ug nakahaling kini og panagbangi tali sa mga tinun-an ni Jesus kon kinsa ang labing halangdon. Makita nato dinhi nga ang mga tinun-an ni Jesus wala kaayo makatugkad są panghunahuna są Dios tungod kay sukwahi man kaayo ang salabutan nila sa Dios. Hinonoa, gidala sila ni Jesus sa pagpasabot pinaagi sa iyang pag-ingon: “Kon buot kamo mamahimong halangdon, pabilin diha sa iwit ug mag-alagad sa tanan.”

Ang kahalangdon, sumala pa sa unang pagbasa, makita diha sa mga kınaiya nga malumo ug mapailobon ug buot nga mamahimong iwit sa tanan, ug usahay tinamay pa gani. Sukwahi man kini sa unsay kahalangdon sumala sa atong tawhanong panabot. Mao man ni silang mga tawo nga naa kanunay sa ibabaw, sila nga mga batid. But God’s ways of being great is found in those who will to serve, those who are at the least of all. Ug aron pagpatisuk sa buot gipasabot ni Jesus sa ilaha, mitawag siya og usa ka bata – a symbol of a humble, dependent and trusting person. Matud pa ni Jesus: “Si kinsa ang magdawat niining bata, nagdawat kanako.” Pasabot, ang pamaagi sa Ginoo makita diha sa pagdawat sa mga bata nga nagsimbolo sa mga anaa sa ubos, mga kabus ug diha sa mapaubsanong pagpangalagad.

Ang Sto. Niño, ang Batang Jesus, mao ang labing hingpit nga hulagway niining mga pagtulon-an. Diha sa Balaan nga Bata, atong nasinati ang pagdan-ag sa matuod nga kahayag sa kalinaw, kalumo ug panaghiusa. Diha sa Batang Jesus, makita nato ang tinuoray nga pagpaubos, kamasaligon, kaputli, ug yano nga pagtuo. Dili Siya hari nga naglingkod sa trono, kondili usa ka bata nga nag-awhag kanato sa pagduol sa Dios nga wala’y kahadlok ug wala’y garbo. Siya ang Hari ug Dios nga nagpakatawo ug mipuyo uban sa atong ubos nga kahimtang aron sa atong pagkatawhanon makakat-on kita pagdawat sa atong isigkaingon isip atong igsuon. Siya ang Hari nga nagtudlo kanato sa matuod nga kahulogan sa pagkahalangdon.