Kasikas sa Pag-amoma

Aduna bay punto sa imong kinabuhi nga mihunong ka sa pag-amoma sa imong kaugalingon? Gawas sa pulong gugma, akong nakita nga nindot pud ang pulong amoma. Nahinumdom ko sa naa pa ko sa elementarya ug hayskul diin nauso ang pagbayloay og hulagway uban sa mga higala matag tuig human sa klase. Sa luyo niining litrato ang mensahe sa pagpahinungod. Nagsugod o natapos kini sa linya, “Pag-amping tungod kay nagpakabanâ ko nimo.”

Atong gi-amoma ang mga tawo nga mahinungdanon sa atong kinabuhi. Gibuhat ang labing maayo ug nagpadayon sa paghatag aron mapalambô ang atong relasyon kanila. Giunsa nato pagdawat ang pag-amoma? Kung nag-amoma ka sa mga tawo, giamomahan ba pud ka nila? Dili ko motuo nga adunay timbangan sa pag-amoma. Adunay nagkalainlaing lebel ang gihatag, gidawat, ug gikinahanglan sa mga tawo niini nga personal kaayo.

Dugang pa, ang pag-amoma sa usa ka tawo nanginahanglan og paningkamot. Gipaambit ug gihatag nato ang usa ka bahin sa atong kaugalingon. Kung nag-amoma ta sa uban aduna pud bay katuyoan nga maningkamot ta sa pag-atiman sa atong kaugalingon? Sa usa ka kalibutan nga daghan ang panginahanglan, aduna pa ba kaha kitay panahon ug kusog nga makaatiman sa atong kaugalingon?

Sa akong klinikal nga praktis, nakahimamat pud ko’g mga tawo nga wala naninguha sa pagtabang sa uban. Akong gituohan nga ang mga nag-atiman sa uban o wala adunay kalagmitan nga dili magtagad sa ilang kaugalingon. Karon, balik ta sa akong unang pangutana. Mihunong ka na ba sa pag-amoma sa imong kaugalingon?

Atol sa counseling ug psychotherapy sesyon, akong namatikdan nga ang tawo nga daw wala magtagad sa ilang kaugalingon adunay susama nga kasinati-an sa ilang pagkabata.

1. Naabuso sa bata pa. Ang pag-abuso mahimong pisikal, mental, emosyonal o sekswal. Ang mga giabusohan mahimong madiskonekta sa kaugalingon, nga nagpalisud sa tawo sa pag-atiman sa kaugalingon, kung dili matabangan, hangtud sa pagkatigulang. Ang makahadlok nga tingog sa nag-abuso naghasol bisan sa mga hamtong.
2. Napasagdan o gisalikway sa gamay pa. Ang napasagdan nga bata motubô sa paghunahuna nga siya dili takos sa pag-atiman sa uban. Kung ingon ani ang bati-on sa tawo, unsaon niya paghunahuna nga unahon pag-amoma ang iyang kaugalingon?

Daghang mga higayon nga akong gisulat nga ang nangagi mahinungdanon kaayo kung kinsa kita. Apan dili na nato mausab ang nangagi. Bisan pa, mahimo nato ang tanang panahon ug kusog, atubangon ang atong pagkahuyang pinaagi sa pagsulay sa pag-ayo sa nasamdan nga bata.

Kung ikaw usa ka batang nasamdan, giabusohan man o gipasagdan, kung imong balikan, unsa ang imong nakita niining bataa? Tan-awa pag-ayo ang mga mata sa bata. Pagkakita nimo niining bataa, unsay imong gusto isulti kaniya? Duol sa bata, hangopa kining samdan. Sama sa imong karon, hunghongi kining bataa, “maamoma ko ikaw, amomahon tika.”

Hinaot nga mapahinumdoman usab kita nga taliwala sa tanang kasakit ug mga pagsulay, mapaubsanon kitang mosangpit kanunay sa Diyos. Ang Ginoo sa walay kondisyon mipasalig, “Bisan hangtud sa inyong katigulangon ug ubanon Ako mao Siya, Ako ang moamoma kaninyo. Gibuhat ug dalhon ko kamo. Tabangan ko kamo ug luwason” (Isaias 46:4).