Bunyag: Pakighiusa ni Kristo sa Kasinati-an sa Tawo

Ang atong Ebanghelyo karon naghisgot nga sa wala pa magsugod si Hesus sa iyang publikong kinabuhi, miadto Siya sa suba sa Jordan kung diin si Juan nagbunyag alang sa ‘paghinulsol aron sa kapasayloan sa mga sala’. Mitusmaw si Hesus sa tubig sa dakong pagpaubos sa Iyang kaugalingon, mitindog uban sa mga maniningil sa buhis, sundalo, pariseo, saduceo ug mga babayeng mubo’g lupad, nga buot magpabunyag ni Juan.

Bisan walay sala si Hesus, mitusmaw siya sa tubig uban sa mga makasasala. Gipili Niya ang pagpaduol kaysa pagpalayo kanila. Usa kini ka panig-ingnan nga ang tawo nagkinahanglan sa kapasayloan sa Ginoo ug ang pagpangayo sa kapasayloan nagkahulogan og pagpaubos, pag-angkon, ug pagdawat sa kamatuoran nga kitang mga tawo makasasala. Kung atong hunahunaon, dili na gyud unta angay nga magpabunyag si Hesus kay ang bunyag usa man ka ‘paghinulsol alang sa kapasayloan sa mga sala’ ug kita nasayud nga si Hesus hinlo sa sala.

Sa akong pagpamalandong, ang bunyag ni Hesus dili tungod kay Siya naay sala, kondili isip usa ka hingpit nga pagsulod sa kasinati-an sa tawo, pag-ambit sa tawhanong panginahanglan sa pagpasaylo, kalisdanan sa kinabuhi, ug pagpakita sa koneksyon niini sa kahuyang sa tawo. Siya nagpatalinghog sa atong inagulô, panghupaw, pakigbisog, ug pag-antos gikan sa kabalaka, trauma, o emosyonal nga kasakit. Dili ba usa kini ka dakong kahupayan alang kanato nga ang Anak sa Diyos nagpaubos ug nakighiusa uban kanato?

Sa sikolohiyang panan-aw, ang kahupayan, kaayohan, ug emosyonal nga pagbangon molambo diha sa luwas nga relasyon diin ang tawo dili hukman kondili kuyogan. Matud pa ni Carl Rogers, usa ka humanistic psychologist, “Ang empatiya mao ang mapaubsanon nga pagsulod sa kalibutan sa kliyente, nga walay paghukom ug punô sa pagsabot.” Ang tinuod nga empatiya naglangkob sa pagbatì uban sa kliyente.

Tungod niini, gikinahanglan nato ang pag-angkon ug pagdawat sa kamatuoran nga ang kahupayan o kaayohan magsugod gayud kon atong tugotan ang atong kaugalingon nga makakita ug modawat sa atong mga kahuyang. Ang mga kalisdanan sa himsog nga panghunahuna kasagarang mograbe kung ang kasubô, kahadlok, o trauma idumili. Ang bunyag ni Hesus nagtudlo kanato sa madasigong pagdawat—dili pagsurender, kondili pagsalig ug pag-atubang sa kamatuoran uban sa pagtuo.

Sa laing bahin sumala sa Katesismo sa Katolikong Simbahan, 537, “Ang Kristohanong bunyag naghiusa kanato sa kamatayon ug pagkabanhaw ni Kristo.” Daghang panaw sa himsog nga panghunahuna o mental health nga naglakip ug mga simbolikanhong “kamatayon” sa daang mga batasan—kahadlok, dili nindot nga pagsaway sa kaugalingon, ug makadaot nga mga pamatasan—ug hinayhinay nga “pagkabanhaw” ngadto sa mas himsog nga paghunahuna ug pagkinabuhi. Tukma kini sa New Year’s resolusyon nga kasagaran natong buhaton kada bag-ong tuig.

Sa katapusan, ang bunyag ni Kristo nagpahinumdom kanato nga wala kita nag-inusara sa atong pakigbisog. Ang kaayohan usa ka panaw nga naglakip sa kaugalingon, katilingban, ug sa Ginoo. Sama sa pakig-ambit ni Kristo sa atong pagkatawo, atong hangpon ang atong kahuyang, mangayo’g tabang, ug maningkamot sa paglambo diha sa kadasig, kalinaw, ug pagtuo ni Kristo sa atong pagpadayon sa panaw sa kinabuhi.