Artsidyosesis, mitak-op sa hubileyo apan padayon ang paglaum

Artsidyosesis, mitak-op sa hubileyo apan padayon ang paglaum
Niadtong Disyembre 28, 2025, human sa usa ka tuig nga pagsaulog sa Ordinaryo nga Tuig sa Hubileyo sa Paglaom, pormal nga gitapos sa Artsidyosesis sa Sugbo ang maong kasaulogan pinaagi sa pagsaulog sa kasaulogan sa Santos nga Misa ug sa yano nga rito sa pagtapos sa tuig sa Hubileyo didto sa Cebu Metropolitan Cathedral.

Ang Santos nga Misa gipangulohan sa talahurong Arsobispo sa Sugbo, Alberto “Abet” Uy, D.D., uban kaniya sila si Msgr. Rogelio Fuentes, ang vicar general sa artsidyosesis; Msgr. Renato Beltran, ang Chancellor sa artsidyosesis; mga pangulo sa nagkalain-laing mga komisyon ug mga rector sa mga seminaryo; mga episcopal vicars; ug mga pari gikan sa katedral, ug mga relihiyoso pari.

Sa iyang wali, gipaambit ni Arsobispo Uy nga nindot nga nadungan sa kapistahan sa Santos nga Banay sa atong Ginoo ang pagtapos sa Hubileyo tungod kay diha man sa banay atong unang makat-unan ang paglaum. Dugang pa niya nga sa pag-abli sa mga Holy Door, gipakita sa Simbahan nga ang dakong kaluoy sa Dios giablihan para sa tanan. “When the Holy Door is opened, it tells us: God’s mercy is wide open. When it is closed, it gently reminds us: Now take that mercy home.” Sa pagtak-op sa Hubileyo, dugang pa sa arsobispo, wa magpasabot nga ang grasya ug kaluoy sa Dios mohunong na ug mawala na ang paglaum.

“No, it simply means that it is now our mission to share the grace of the Jubilee with others. The Holy Door is not closed so that grace may stop. It is closed so that grace may continue through us.”

Ug diha sa panimalay, sa pagbuhat sa gugma ug mga buhat sa kaluoy, gilarawan sa arsobispo nga usa ka Holy Door ang giablihan sa balay. Iyang gihatag ngadto sa mga pamilya ang misyon nga gibilin sa Simbahan, nga mamahimo untang eskwelahan sa paglaum, dalangpanan sa kalooy ug gugma, ug isip mga saksi sa gugma sa Dios diha sa ordinaryo nga kinabuhi ang matag pamilya. Iyang panghinaot nga unta mamahimong inspirasyon sa pagkabalaan sa matag pamilya ang nagbalaan sa Santos ng Banay sa atong Ginoo, nga mao ang pagsalig ug pagtuman sa kabubut-on sa Dios.

Kahinumduman nga sulod sa Tuig sa Hubileyo, ang tibuok Simbahan niagi sa dakong kabag-ohan sa liderato sa Simbahan. Ang Hubileyo gibuksan ni Papa Francisco niadtong Disyembre 24, 2024, ug sa Abril 21, namatay siya. Human sa pipila ka semana, niadtong Mayo 8, napili si Robert Francis Cardinal Prevost isip bag-ong Santo Papa, diin iyang gidala ang pangalan nga Leon XIV. Si kanhi Cardinal Prevost mianhi na sa Sugbo sa pipila ka higayon, lakip niadtong 2009 sa dihang siya Superior General pa sa mga Agustino diin misaulog siya sa Santos nga Misa isip kasaulogan sa Kapistahan ni Señor Santo Niño.

Ang Artsidyosesis sa Sugbo, nakasinati usab og kabag-ohan sa liderato. Niadtong Hunyo, nadawat sa mga kaparian ang ilang bag-ong mga asaynment sa mga parokya ug komisyon sa Sugbo, ug niadtong Hulyo 16 sa miaging tuig, pormal nga gidawat sa Santo Papa ang pagretiro ni Arsobispo Jose S. Palma isip Arsobispo sa Sugbo ug gituboy si Obispo Abet S. Uy, kinsa kaniadto Obispo sa Tagbilaran, isip mopuli nga Arsobispo sa Sugbo.

Pormal nga gidawat si Arsobispo Uy sa iyang pag-abot sa Sugbo niadtong Septiyembre 29, ug niadtong Septiyembre 30, gi-instalar siya isip ikalima nga Arsobispo sa Sugbo. Apan sa pagkagabii sa instalasyon, human sa mga kasaulogan, giuyog ang Northern Cebu ug ang tibuok isla sa Sugbo sa makusog nga 6.9 magnitude nga linog. Daghang mga tawo ang nangamatay ug nasamdan, mga panginabuhian nga naapektuhan, ug mga balay, mga establisimyento, ug mga simbahan nga nangatumpag. Human sa maong kalamidad, gipangulohan ni Arsobispo Uy ang programa nga Hatag Paglaum, nga midalit og panabang sa naapektuhan sa linog. Nagpadayon kini human naigo na usab ang Sugbo sa Bagyong Tino, ug hangtod karon, nagpadayon ang pagtabang sa artsidyosesis sa pagpabalik sa panginabuhian sa mga biktima sa kalamidad.

Sulod sa tuig sa Hubileyo, nagkalain-laing mga programa nga gisalmotan sa mga magtutuo ang gihimo. Ang matag buwan gisaulog isip Hubileyo pahinungod sa nagkalain-laing mga sektor sa katilingban, pinangulohan sa nagkalain-laing mga komisyon sa Simbahan. Gitagaan usab sa pasidungog ang mga layko nga nakatampo sa kinabuhi sa artsidyosesis pinaagi sa ilang pagpangalagad sa Simbahan sa Sugbo.

Niadtong Nobyembre 30, 2025, pormal nga gibuksan ang siyam ka tuig nga pagpangandam sa Sugboanong Simbahan sa Hubileyo sa usa ka gatos nga anibersaryo (2034) sa pagpasaka sa Sugbo isip Artsidyosesis niadtong 1934. Sentro niining sinodanhong panaw ang hingpit nga pagkahimong buhing Simbahan sa Sugbo. Ug niadtong Enero 3 ning bag-ong Tuig sa Ginoo 2026, atol sa Solemnidad sa Labing Balaang Ngalan ni Jesus, gipasalamatan ug gipasidunggan ang nagkalain-laing mga parokya nga napili isip Jubilee Churches, ug mga tawo nga nahimong parte sa nagkalain-laing mga programa sa artsidyosesis, lakip na kadtong mga mipaambit sa ilang mga kinabuhi sa Stories of Hope, ug pormal nga giablihan sa Cebu Archdiocesan Digital Communications Ministry ang “Balik Lantaw sa Panaw,” ang pasundayag diin gipakita ang mga kahimanan nga nagsilbing handumanan sa miagingHubileyo 2025, tuig sa Paglaum. | STEPHEN SALVADO