Gidapit ang Santo Papa alang sa sentenaryo sa Cebu sa 2034

Gipadala na ang usa ka imbitasyon ngadto kang Pope Leo XIV aron motambong sa sentenaryong selebrasyon sa Roman Catholic Archdiocese of Cebu sa 2034; usa ka hitabo nga gilauman sa mga lider sa lokal nga simbahan nga dili lamang magtimaan sa kasaysayan, kondili magdala usab og pagbag-o sa pagtuo.

Si Cebu Archbishop Alberto S. Uy miingon nga ang mga magtutoo makapaabot og “dako” nga selebrasyon alang sa ika-100 nga tuig sa artsidyosesis, bisan pa man nga ang mga pagpangandam anaa pa sa sayong yugto.

“Can you imagine a hundred years of grace? This is more than just a celebration,” matod ni Uy atol sa press conference niadtong Martes, Abril 28, 2025, pipila ka oras sa wala pa niya ipahayag ang iyang State of the Archdiocese Address didto sa Cebu Metropolitan Cathedral.

Niadtong maong adlaw usab, gisaulog sa artsidyosesis ang ika-92 nga anibersaryo niini, nga nagtimaan sa iyang pag-saka isip artsidyosesis niadtong 1934.

Abli nga imbitasyon

Gibutyag ni Uy nga ang imbitasyon gipasa na ngadto sa Santo Papa pinaagi sa Catholic Bishops’ Conference of the Philippines (CBCP), uban sa paglaum nga makabisita ang Papa dinhi sa Cebu sa panahon o bisan pa sa wala pa ang 2034 jubileo nga tuig.

“Open invitation para siya ra gyud ang atoang tagaan og freedom for the right time sa iyahang pagduaw diri sa Cebu,” matod ni Uy.

Gawas niini, gipadayag usab sa arsobispo ang pag-ampo alang sa beyatipikasyon ni Teofilo Camomot, usa ka obispo nga taga-Cebu kansang kahimtang padulong sa pagkasanto nagpadayon sa pagdani og interes sa mga magtutoo.

Labaw pa sa kadungganan

Bisan og gihisgutan ni Uy ang “dako” nga selebrasyon, gipatin-aw niya nga dili kini pasabot og kahayahay o sobrang kadungganan.

“Ang ‘dako’ dili kinahanglan pasabot nga engrande o mahalon,” iyang giingon, ug gipasiugda nga ang tumong mao ang pag-apil sa tanang sakop sa artsidyosesis.

Sa kasingkasing sa panan-aw alang sa sentenaryo mao ang pagbag-o. “By that time, atong i-ampo nga anang panahona ang atoang Archdiocese of Cebu mahimo gyud siyang fully alive church,” matod ni Uy.

Iyang gihulagway kini isip usa ka Simbahan diin ang mga magtutuo makasabot sa ilang pagtuo, magsaulog niini uban sa kalipay, ug ipakita kini sa ilang adlaw-adlaw nga kinabuhi.

Padayon nga panaw

Nagpadayon pa ang pagplano alang sa 2034 jubileo, ug wala pa’y pinal nga detalyadong plano.

Ang buluhaton gipangulohan sa Coordinating Council for Synodal Transformation (C-COST), nga gilangkuban sa mga pari ug layko nga lider nga maoy responsable sa paghimo ug pagpatuman sa mga programa sa lain-laing parokya.

Matod ni Uy, hinay-hinay nga ipahigayon sa konseho ang mga inisyatiba padulong sa sentenaryo, aron masiguro nga ang panaw mismo mahimong makahuluganon.

Pinaagi niini, ang gilauman nga selebrasyon dili lamang limitado sa usa ka tuig; kondili usa ka dekada nga pastoral nga panaw padulong sa pagbag-o. | John Paul Seblos