“Buhata kini sama ni Jose” – Arsobispo Uy

“Paghimo og mas lig-on nga pamilya. Paghimo og mas mahigugmaong komunidad. Paghimo og tulay tali sa katawhan. Paghimo og Simbahan nga mas haduol sa kabus. Ug buhata kini sama ni Jose nga wala mangita og rekognisyon – mahilom, matinuod-anon, ug kanunay alang sa himaya sa Dios.” Kini tipik ug kabahin sa mensahe ni Arsobispo Alberto S. Uy alang sa National Shrine of St. Joseph (NSSJ) nga nagsaulog sa dakong timailhan sa grasya sa Dios sa panaw niini isip Simbahan.

Niadtong Agusto 8, 2026, malampuson nga gisaulog sa National Shrine of St. Joseph sa dakbayan sa Mandaue ang ika-25 nga Anibersaryo sa Dedikasyon sa Simbahan ug Deklarasyon isip National Shrine. Usa kini ka timaan sa nagpadayong grasya sa Dios ug sa padayon nga misyon sa Shrine isip usa ka lugar sa pagsimba, pag-ampo, ug pagpanaw.

Nangulo sa pagsaulog sa Santos nga Misa si Arsobispo Uy pagka alas 4 sa hapon. Giubanan siya sa team of pastors pinangulohan ni Msgr. Rogelio Fuentes (Vicar General), ug mga bisitang pari.

Gipahinumduman ni Uy ang mga magtotoo nga ang anibersaryo mahimo lamang tiunay nga mabungahon kon magpadayon kita sa pag-amoma sa puloy-anan sa Dios – ang Simbahan ug Iyang katawhan.

Gidasig niya ang tanan sa pag-amping sa Simbahan ug paghimo niini nga balaan, aron sa matag higayon ang katawhan mosulod sa iyang mga pultahan, sila mas motubo diha sa gugma sa Dios ug sa usag-usa.

Namalandong sa kinabuhi ni San Jose, ang Arsobispo naglantaw sa Simbahan nga mahisama kang San Jose: usa ka Simbahan nga mamati, Simbahan nga manalipod, ug Simbahan nga nagbuhat.

Paghuman sa Pag-ampo human sa Pangalawat, si Arsobispo Uy, Msgr. Fuentes, ug Vivian Carbonilla (ang PPC President) gipahayag ang Tripod Pastoral Program sa NSSJ. Kini nagtimaan sa pasalig sa Shrine sa bag-ong ebanghelisasyon, mahigugmaong serbisyo, ug pagpauswag sa karisma, hiyas, ug pagkatawo ni San Jose, alayon sa pagpangandam sa Artsidyosesis alang sa Yubileyo inig 2034 ug sa panawagan ni Arsobispo Uy sa pag-amoma sa usag-usa.

Ug unya gibasa ni Padre Junel Fuentes ang mensahe ni Padre Reynante Tolentino, ang Presidente sa Association of Catholic Shrines and Pilgrimages of the Philippines.

Nahimo usab nga mas espesyal ang kalihokan sa pagbasa sa Mensahe ug Paghatag sa Apostolikanhong Panalangin gikan ni Pope Leo XIV, nga gibasa ni Padre Ronmarth Reysan Cabase.

Gihatagan sa Artsidyosesis sa Sugbo ang NSSJ og Special Year of Grace, diin ang mga magtotoo makabaton og plenarya indulhensiya pinaagi sa pagduaw sa Shrine, tiunay nga pagsalmot sa Eyukaristiya, pagkompisal ug pagpangalawat, ug pag-ampo alang sa mga katuyoan sa Santo Papa ug ang pagsalikway sa sala. | RCAC FB