Akong Higala nga dili gayud diay: Usa ka Kasinatiang Pagsuhidsa mga Kinaiyang Narcissistic

Bag-ohay lang nakong gisusi ang tipo sa akong personalidad ug gipakita sa Myers-Briggs Type Inventory (MBTI) nga PROTAGONIST-(ENFJ) ko. Kadaghanan sa mga gihulagway niini nga personalidad nakapadasig kanako, ilabi na sa pag-ingon nga ang empatiya mao ang akong labing dakong kusog apan possible pud kining kahinaan nga mahimong mosangpot sa akong pagkapukan. Ang pag-alagad pag-ayo sa uban usa ka gasa, apan mahimo usab kining rason nga makaupos sa emosyon ug kahuyang diha sa pagbutang sa sayop nga pagsalig.

Kini nga pagtulon-an nakapadulot og tinuod nga kasakit sa dihang akong naamgohan nga ang usa ka tawo, nga akong giisip nga suod nga higala sa kapin traynta (30) ka tuig, dili gayud diay mao ang tinuod nga higala nga akong gituohan nga siya. Usa kadto ka makahuloganong higayon nga kalit nagdala kanako sa mga miaging kasinatian nga mahatagan og pagtagad. Usa ka sumbanan ang mitumaw ug ang tanan ingon og nabutang sa lugar. Ang pagkaamgo niini nakapakurat kanako, nakapasakit pag-ayo, ug nakapasubô sa pagkawalâ sa usa ka panaghigalaay nga abi gayud nako’g matinud-anon.

Sa akong pagpangita alang sa kasayoran ug kaayohan, nagsugod ko’g basa bahin sa narcissistic nga mga kinaiya ug manipulative nga mga relasyon. Nagbasa ko’g libro, POWER, nga gisulat sa psychotherapist, Shahida Arabi ug nagsunod ko sa mga posts sa usa ka Neuroscientist ug Neuroplasticity Expert, Dr. Caroline Leaf.

Ang ilang kahibalo ug kaalam nakatabang kanako sa pag-ila sa mga kinaiya nga akong nataligam-an sulod sa mga katuigan. Sa paghinumdom, nakita nako ang mga sumbanan sama sa love bombing nga gisundan sa devaluation, triangulation, recruiting allies, smear campaigns, gaslighting, projection, ug narrative soothing. Bisan kung ang usa ka tawo adunay klinikal nga dayagnosis o wala, kini nga mga pamatasan mahimong makadaot sa mga relasyon.

Ang mga mental health propesyonal kanunay nga nakamatikod nga ang mga tawo nga adunay lig-on nga narcissistic nga mga kinaiya mahimong makigbisog sa empatiya, kalisud sa pagdawat sa responsibilidad sa ilang mga binuhatan, ug lagmit nga basolon nila ang uban kaysa susihon ang ilang kaugalingon. Ang pag-ila niini nga mga sumbanan nakatabang kanako nga masabtan kung unsa ang akong nasinati – dili ang paghusga sa usa ka tawo, apan aron masabtan nako ang akong kaugalingong panaw ug magsugod sa pagpadayon.

Samtang namalandong ko sa Ebanghelyo karon, Mateo 13:24-43, ang sambingay sa mga sagbot taliwala sa trigo, nagpahinumdom kanako nga kita nagpuyô uban sa mga tawo nga lainlai’g personalidad, motibo, mithi, ug pagpili. Ang uban nagdala’g kahayag, pagkamabination, ug pagkamasaligon sa atong kinabuhi samtang ang uban nagdala’g kasakit ug kalibog. Dili kita kanunay makapili kon kinsa ang mahimamat sa atong dalan apan makapili kita kon unsaon nato pagsanong ug kinsa ang atong tugotang makasulod sa atong kinabuhi.

Nagsugod ang akong kaayohan sa dihang akong gipili nga mobalik sa akong tinuod nga pagkatawo: usa ka hinigugmang anak sa Diyos. Kini nga kamatuoran nahimong akong angkla. Gipili nako nga pasayloon ang tawo nga nakapasakit kanako – dili tungod kay ang nahitabo dali rang madawat apan tungod kay ang pagpasaylo naghatag og kagawasan sa akong kasingkasing. Sa samang higayon, akong nakat-onan nga ang pagpasaylo wala magkinahanglan sa pagbiya sa pagbutang og maayong mga utlanan.

Kini nga kasinatian nagtudlo kanako sa paghatag og bili sa tinuod nga panaghigalaay, sa pag-ila sa mga relasyon nga gitukod sa usag usa nga pagtahod, pagkamatinud-anon, ug sa pagpanalipod sa akong kalinaw. Samtang naglaum pa ko nga kadtong nakapasakit sa uban, sa umaabot makakaplag unta’g kaayohan ug kausaban. Wala na ko molingi sa mga nangagi uban ang dili maayong kabubut-on. Hinuon, nagpadayon ko uban ang mas dakong kaalam, mas lawom nga kagawasan, ug usa ka nabag-o nga pasalig nga maoy mutogot kanako sa pagpuyo sa akong kinabuhi isip hinigugma sa Ginoo.

References:

Arabi, S. (2017). Power: Surviving and thriving after Narcissistic Abuse. Thought Catalog Books.

Leaf, C. [@drcarolineleaf]. (2026, June 28). The people you lose during your healing process are only meant to be with the unhealed version of you. Instagram. https://www.instagram.com/p/DZgUsHzDfSu/?hl=en