Dili magdinato bisan pa og dato

Usa ka opisyal sa gobyerno ang gibatikos karon sa mga tawo tungod kay napasanginlan siyang adunay “conflict of interest” sa usa sa dakong anomalya kabahin sa pag-develop og mahalon nga puloy-anan nga giingong dako og epekto sa kaguba sa kalikopan.

Tubag sa maong opisyal nga dili siya dato apan naangkon niya ang maong “property” sulod sa pipila katuig pinaagi sa iyang pagkugi sa pagtrabaho ug dili tungod sa iyang pagka opisyal sa gobyerno.

Tinuod, daghan ang mga kaso nga ingon niini nga bisan tuod og gikan sa yano ug pobre nga kinabuhi milambo ug misaka ang antas nga kinabuhi tungod sa kakugi ug grasya sa Ginoong Dios.

Apan tingale angay pud nga hunahunaon nga dili man ang kakugi maoy hinungdan sa mga batikos sa mga tawo. Tingale ang hinungdan mao ang dili haom o nanghinobra nga bili sa kabtangan kon itandi sa estado o katungdanan sa hingtungdan. Mao man gani nga anaa sa Konstitusyon sa Republika sa Pilipinas (Artikulo XI, Seksyon 1) nga ang mga opisyales gimandoan sa pagpuyo og semple nga kinabuhi, uyon sa ilang maabot. Laktod, likayan nila ang pagpuyo og maluho nga pagkinabuhi. Kon ang opisyales sa gobyerno magpundar na og mga kabtangan nga mokabat sa milyones o bisan gani trilyones, halayo na kini sa giingong semple nga pagkinabuhi.

Niining kasoha mahimong mahinungdanon ang prinsipyo nga dili tungod kay makahimo man, himoon na lang. Dili tungod kay “maka-afford” man, paliton na lang. Dinhing tungora gikinahanglan ang hiyas sa pagkamatarong (prudence). Sakto o angay ba nga buhaton kini? Sakto o angay ba nga paliton kining butanga, yutaa, condo, apartment, mansion, ug uban pa?

Ang paningkamot sa tawo gasahan gayod og mga bunga gikan sa Dios. Apan gidahom gikan sa iyang mga sumusunod ang kaantigo sa paghunahuna kon unsay angay nga buhaton sa iyang mga gasa. Tan-awa kadtong adunahang tawo (Lk. 12: 13-21) nga ang pagtigom lamang sa iyang abot ang gisiguro aron magpahayay sa iyang kaugalingon. Gipahinumduman siya sa Dios nga kawang ang iyang gitigom para sa kaugalingon kay dili kini maoy punto sa iyang kinabuhi.

Dili mahimong rason ang kakugi ug kalampusan sa kinabuhi aron matabunan ang dili haom sa kinabuhing Kristohanon. Mao nga ang kanhi Santo Papa Francisco, sa dihang natuboy siyang Santo Papa, nakitaan og talagsaong ehemplo sa iyang pagpaningkamot nga magpuyo og semple nga kinabuhi taliwala sa maluho nga kinabuhi sa Vatican. Daghan siyag wala gisunod nga giingong tradisyon sa Simbahan alang sa mapili nga Santo Papa. Sa ingon gitudlo niya sa katawhan nga mahimo ra gyud diay nga DILI MAGDINATO BISAN PA OG DATO.