Ika-40 ka tuig human sa ika-4 nga sinodo sa Artsidyosesis sa Sugbu

Sa kolum nga “Kasoy” ni Padre Vito Jumao-as niining mantalaan (p.5), gisaysay niya nga ika-40 na ka tuig human sa Ika-4 nga Sinodo sa Artsidyosesis sa Sugbu niadtong 1986 ug ika-24 ka tuig human sa Priests’ Congress niadtong 2002.

Ang Sinodo sa Arstidyosesis sa Sugbu niadtong 1986 ug Priests’ Congress niadtong 2002 naghisgot kabahin sa kahimtang ug kauswagan sa kinabuhi ug misyon sa Simbahan. Lakip niini ang usa ka mahinungdanon kaayong kahimanan sa kausaban nga hangtod karon nagpabilin nga gilaumang mapatuman – ang Standard Living Allowance sa kaparian o SLA.

Ang SLA usa ka instrumento nga makatabang pag-ayo sa kinabuhi ug misyon sa Simbahan. Makahimo kini sa pagmatuod sa gihambin nga kaayohan sa Simbahang lokal nga hiniusang panudlanan sa Artsidyosesis, ug kaparian nga nagtutok sa pagpangalagad sa Dios ug katawhan nga wala masakmit ang atensiyon ug maputos sa kabalaka sa materyal ug kalibutanong mga butang.

Pinaagi sa SLA malikay ang kaparian sa sobrang paggukod ug pagtigom og salapi ug kabtangan alang sa kaugalingon nga klarong sukwahi sa bokasyon ug kinabuhi sa pagkapari. Si Arsobispo Socrates Villegas kausa miingon nga usa ka eskandalo alang sa usa ka pari nga mamatay nga adunahan. Kini tungod kay ang pari naglaraw man sa pagsunod sa kinabuhi ni Kristo nga naghalad sa kaugalingon alang sa kaluwasan sa katawhan. Anaa ba guy maghalad sa kaugalingon nga maoy halaran? O di ba kaha maggukod sa mga halad sa tawo?

Kon limitado ug regulado ang pundo nga ihatag sa pari alang sa iyang kaugalingon sigon sa iyang panginahanglan lamang ug dili sigon sa iyang gusto, mausab ug mas mapalig-on ang iyang pagtutok sa iyang ministeryo. Dili na siya maggukod kon asa siya labyog aron makakuha og stipend ug kasigurohan sa iyang kaugmaon kay ang suporta nga iyang gikinahanglan ikahatag naman sa Artsidyosesis. Malikay siya sa pagpahimulos sa katawhan nga iyang gialagaran tungod kay adunay pagkaamgo nga wala ra gyud siyay angay kabalak-an alang sa umaabot kay ang suporta sa Simbahan konkreto ug sigurado.

Ug kon mahitabo kini, mahiusa unya ang pundo gikan sa mga parokya ngadto sa Artsidyosesis ug mas makasanong siyag maayo sa panginahanglan sa iyang katawhan labi na ang mga kabus tungod kay ang bahandi sa Simbahan matigum naman ug maapod-apod sa nagkalainlaing mga panginahanglan niini. Sa ato pa, ang SLA nagdala og kausaban sa tibuok simbahang lokal pinaagi sa pagbaton sa espiritu sa kaangayan ug hustisya.

40 ka tuig human natisok ang binhi sa SLA sa 4th Diocesan Synod of Cebu ug 24 ka tuig human kini gipanghingosgan sa Priests’ Congress. Sa hataas nga panahon, tingale og hinog na ang mga hunahuna kasingkasing aron mapatuman kining mahinungdanong kasangkapan alang sa kausaban sa kinabuhi ug misyon sa Simbahan sa Artsidyosesis sa Sugbo.