Nag-inusarang high school seminary sa Sugbo naglunsad sa unang fun run pangpalambo sa bokasyon

Aron mapukaw pag-usab ang interes sa kinabuhi sa pagkapari ug masuportahan ang mga programa sa pormasyon, ang Pope John XXIII Seminary – ang nag-inusarang high school seminary sa Sugbo – naglunsad sa ilang unang fun run karong umaabot Agosto.

Nahimutang sa Barangay Luz, dakbayan sa Sugbu, naglaum ang seminaryo nga ang maong inisyatiba dili lamang makatigom og pondo kondili makapabalik usab sa pagtagad sa publiko sa kahinungdanon sa bokasyon sa pagkapari ug pormasyon.

Ang fun run nga pagahimoon sa Agosto 8, 2026, gipahibalo atol sa press conference nga gihimo sa seminaryo niadtong Mayo 2.

Pagdagan alang sa misyon

Alang sa mga alumni sa seminaryo, ang kalihokan dili lang usa ka lumba kondili tubag sa nagkadako nga kabalaka.

“We need to boost the production of output (priests) by boosting the input,” matod ni Engr. Pert Cabataña, presidente sa alumni, nga naghinumdom sa panawagan ni Cebu Archbishop Alberto Uy aron atubangon ang pagkunhod sa bokasyon sa pagkapari.

Gipunting ni Cabataña nga dako na ang pagkunhod sa enrollment sa ninglabay nga mga katuigan. Gikan sa kapin 200 ka seminarista sa iyang panahon (1969), ninaog na kini ngadto sa 88 ka enrollees sa bag-ong natapos nga formation year 2025–2026.

Ang fun run nagtinguha nga mabaliktad kining kahimtanga pinaagi sa pagpakita pag-ayo sa seminaryo sa publiko, ilabi na sa mga batan-on nga naghunahuna pa sa ilang kaugmaon.

Giila ni Seminary Rector Fr. Allan Delima nga mas lisod na karon ang pagdani og mga estudyante.

“Mga batan-on karon, daghan nag options,” matod ni Delima, nga nagpasabot sa daghang oportunidad nga anaa karon alang sa kabatan-onan.

Bisan pa niini, iyang gipasiugda nga abli gihapon ang seminaryo alang sa tanang andam mosusi sa ilang bokasyon.

“We welcome them as they are. In the course of their seminary stay, they will have the desire for priesthood. If not priesthood, mostly consider other careers as professionals,” dugang niya.

Gawas sa pagpahibalo sa publiko alang sa bokasyon, ang kalihokan nagtinguha usab nga makatigom og pondo alang sa mga panginahanglanon sa seminaryo.

Ang malikom nga pondo gamiton alang sa pagpaayo ug pagpalapad sa mga classroom ug opisina, ingon man sa pagdugang sa pondo alang sa scholarship programs sa mga estudyante.

Matod ni Architect Ace Dueña, event director ug alumnus, nagtinguha ang mga organisador nga makaabot og labing menos 2,000 ka registrants.

Naglaum siya nga ang mga moapil dili lamang mouli nga adunay race kits ug medalya, kondili adunay pagbati nga nakatabang sila sa seminaryo.

“When people go home, they will not go empty-handed, but with the feeling that they have helped the seminary in a great way,” matod ni Dueña.

Detalye sa dagan

Ang mga partisipante makapili sa upat ka kategoriya:
3 km – ₱750 (inclusive of event singlet, medal, post-race meal, and race bib)
5 km – ₱950 (inclusive of event singlet, medal, post-race meal, and race bib)
10 km – ₱1,550 (inclusive of event singlet, finisher’s shirt, medal, post-race meal, and race bib)
21 km – ₱1,950 (inclusive of event singlet, finisher’s shirt, medal, post-race meal, and race bib)

Isip dugang nga insentibo, ang unang 500 ka magparehistro makadawat og libre nga membership gikan sa Landers Superstore. | John Paul Seblos