Pilgrim Image sa Birhen gikan sa Antipolo gihatag sa Sugbu

Sa pagsaulog sa ika-400 nga anibersaryo sa pag-abot sa Nuestra Señora de la Paz y Buen Viaje dinhi sa Pilipinas, ang Dyosesis sa Antipolo misugod sa historikanhong panaw, misubay sa pinakakaraang mga panaw sa Patrona diha sa pagdala sa iyang imahe sa pinili nga mga artsidyosesis, dyosesis, ug pantalan lukop sa nasud.
Ang tinahod nga imahen miabot sa Sugbu niadtong Biyernes, Hulyo 17, nagmarka sa laing katiman-ang yugto sa iyang panaw sa nasud.
Ang mga deboto nagkatigum sa pag-ampo alang sa solemni nga prosesyon gikan sa Apostleship of the Sea – Stella Maris Center hangtod sa Cebu Metropolitan Cathedral.
Sa pag-abot sa Cathedral, si Cebu Archbishop Alberto S. Uy nangulo sa Santos nga Eyukaristiya, inubanan nila ni Padre Manjorey O. Padilla (Parochial Vicar sa Antipolo Cathedral); Padre John Mission (Chaplain sa Stella Maris-Cebu); ang team of pastors sa Cathedral; ug uban pang bisitang pari.
Sa iyang homiliya, namalandong si Arsobispo Uy sa malungtarong pagsaksi sa Our Lady of Peace and Good Voyage, kansang inahanong presensiya nag-uban sa daghang henerasyon nga Pilipino sulod sa gatosan ka tuig.
Gihimunduman niya ang mga pahenante sa barko, mangingisda, migrante, nagpanaw, ginikanan, ug kadtong tanan nga nagpas-an sa kalisdanan sa kinabuhi mapadayonon nga nangayo sa iyang pangaliya, nakakita sa iyang makanunayong pag-uban kinsa kanunay nagtultol kanila kang Kristo.
“Like a loving mother, Mary has patiently accompanied generations of believers; she never grows tired of bringing her children back to Jesus. Ang inahan magpasensya gyud sa mga anak; ingon ana si Maria kanato. Dili siya mahutdan ug paglaum nga kita mausab. Iya kita giyahan kang Jesus,” ingon ni Uy.
Isip malungtarong gasa sa historikanhong pagbisita, ang Dyosesis sa Antipolo pormal nga gisangon ang pilgrim image ngadto sa Artsidyosesis sa Sugbu ubos sa pag-amoma sa Stella Maris Apostleship of the Sea, nagsiguro nga ang debosyon sa Nuestra Señora de la Paz y Buen Viaje magpadayon sa pagdasig sa mga magtotoo sa mga mosunod pa nga katuigan.
Sa usa ka mensahe, ang Obispo sa Antipolo Ruperto Cruz Santos mipadayag sa iyang paglaum nga ang imahen magpabiling pahinumdum sa malungtarong paghigugma sa Bulahang Birhen ug sa iyang inahanong pag-amoma sa iyang mga anak.
“She has come to you. And she desires to remain in your hearts. A loving mother never comes empty-handed. She always brings gifts to her children,” ingon ni Santos. |RCAC FB