Seminar sa mga seremonyero, nagmalampuson

Nagmalampuson ang gipahigayon nga Liturgical Formation Seminar on The Roles of the Masters of Ceremonies and the Parish Worship Committees, pinangulohan sa Cebu Archdiocesan Commission on Worship ug sa Saint Paul VI Institute of Liturgy, didto sa Galilee Central sa Pope John XXIII Seminary niadtong Agosto 14-16, 2026. Tinambungan kini sa sa mga representante gikan sa mga parokya sa Artsidyosesis sa Sugbo. Ang mga gihisgotan sa maong seminar gihatag nila ni Rdo. Msgr. Florencio Salvador, SLD; Rdo. P. Amelito Racelis, SDB, SLL; ug Rdo. P. Raul Pura, CM, SLL, kinsa mga inila nga iskolar sa natad sa Liturhiya sa Simbahan gikan sa Saint Paul VI Institute of Liturgy sa Malaybalay, Bukidnon.

Sa ikaduhang adlaw, atol sa Solemnidad sa Pagpasaka sa Langit sa Mahal nga Birhen Maria, gipangulohan ni Arsobispo Alberto S. Uy ang pagsaulog sa Santos nga Misa. Lakip sa mga mikonselebrar mao sila si Rdo. P. Glenn Therese Guanzon, ang pangulo sa COW, Msgr. Salvador, Padre Racelis, Padre Pura, ug si Rdo. P. Albert Benedict Soliman (OSA) sa Basilica Minore del Santo Niño de Cebu.

Sa iyang wali, gipahimug-atan ni Arsobispo Uy nga dili unta magdinaotay ang mga kaparian ug ang mga layko diha sa pagpangandam sa liturhiya, apan magtinabangay hinuon aron malampuson nga mapahigayon ang liturhiya. Gipaambit usab niya nga matag karon ug unya, kon aduna siya’y mga pangutana kabahin sa liturhiya, sa iyang buhaton sulod sa misa, o sa iyang pagasul-ubon, manawag siya kang Msgr. Salvador, ug kini giisip niya nga importante nga lakang diin mas maayo nga mangutana ngadto sa mga eksperto aron nga matabangan sa mga kalibog ug sa mga pangutana.

Gipaambit sa arsobispo nga kitang tanan giandam alang sa langit, ug nga unta ang paningkamot ug ang mga maayong buhat sa matag-adlaw para gayod sa langit. Gidasig usab sa arsobispo ang mga nanambong nga unta, sama sa ehemplo ni Maria, mamahimo unta sila nga mogawas ug mopaambit sa ilang kaugalingon ug sa ilang kalipay alang sa pagpangalagad ngadto sa uban. “Si Maria magdasig nato nga kon duna’y grasya nga moabot sa atong kinabuhi, dili unta nato solohon… Si Maria magdasig kanato to step out, give ourselves, and share our joys with others. Mga igsuon, maanindot kaayo na siya nga inspirasyon matag usa kanato, ilabi na gyud diha sa parokya. Kanang inyong gipangbuhat, ang pagpangalagad diha sa simbahan, hinaot ko, makapaduol kaninyo sa gingharian sa Dios,” dugang pa niya.

Ang maong seminar nagtinguha sa pagpalambo sa pagpahigayon sa mga liturhikanhong aktibidad sa matag parokya. Kini nahimo usab nga usa ka higayon aron nga makapangutana ang matag-usa ngadto sa mga guest speakers mahitungod sa sakto nga pagpahigayon sa liturhiya. Kini usa usab ka pahinumdom nga kon aduna man gani mga kalibog ug mga pangutana, mamahimo ra nga moduol ang mga seremonyero o ang worship committee coordinator sa matag parokya ngadto sa komisyon alang sa mga katin-awan. | Stephen Salvado