Ang Kahayag sa Panimalay – Gula 3

Natiurok kadiyot si Nicole sa iyang pagkadungog sa giingon ni Aryana nga nausab na daw si Andrew. Nakapangutana siya kon unsay gipasabot sa iyang amiga nga kausaban sa iyang anak nga si Andrew, nga sa iyang pagkasayod, si Andrew buotan man kaayo nga bata. Nakasiguro siya niini kay ninang gud siya sa bata. Sukad sa una nakasunod siya sa pagdako ni Andrew mao nga naglibog siya kon nganong nakasulti si Aryana nga nausab ang iyang anak. Naa bay nabuhat nga dakong sayop si Andrew? O aduna na bay girlfriend siya?

Niigham si Nicole sa selpon ug nangutana, “Unsay pasabot nimo ‘day nga nausab na si Andrew? Unsa diay nahitabo?”

“Giingnan man gud ko niya nga kapoy na daw paminaw nako kay magsige ko og yawyaw nila,” nagbakho nga tubag ni Aryana.

Nagkatawa gamay si Nicole sa pagkadungog niya niini ug miingon, “Aw kana ra diay? Sakto man pud si Andrew! Kapoy gyud bitaw ka paminawon ‘day basta magyawyaw. Kahibaw gyud ko ana. Hahaha…”

“Unsa man ka uy! Abi nakog amiga ta, nganong imo man kong kataw-an?” napikal nga tubag ni Aryana.

“Haha! Siyempre uy amiga gyud ta. Best friends forever gyud ta mao nga puwede gyud ko kakatawa labi na og nagginaga ka ‘day,” tubag ni Nicole.

“Unsa?! Nagginaga diay ko?”

“Oo, wa gyud ka kakuha nganong nasulti tu sa imong anak? Gipaandar pa nimo imong pagka kapayason. Hunong nag bakho diha uy. Wala ra mausab imong anak. Sigurado ko buotan gyud na imong anak nga si Andre. Ako guy ninang anak.”

“Nganong kaingon man tawn ka ana, Nicole, nga gisakitan man ko sa iyang gisulti?”

“Sakitan ka kay wa man ka kasabot,” seryoso nga tubag ni Nicole. “Ang imong anak wa mausab. Buotan gyud na siya. Niabot nalang sa punto nga gikapuyan na siyag kabati sa imong yawyaw ug estilo sa pag-estorya nga daw pirme nasuko bisan og walay kontra. Kon naa man gani kinahanglan mag-usab, ikaw na ‘day.”

Nakapanghinuklog si Aryana sa gisulti ni Nicole. Tinuod mga dagko na ang iyang mga anak nga si Andrew ug ang manghod nga si Arlyn. Tingale miabot na sila sa punto nga mauwaw sila kon yawyawan ug samokan nga makadungog sa iyang tingog nga daw pirme masuko bisan og walay kontra.

“Mao ba, Nicole? Imong tan-aw mao ra gyud na? Wala mamaldito o nisukol ni Andrew nako?” naniguro nga pangutana ni Aryana.

“Oo, uy! Nanagko na imong mga anak ‘day. Kamao na sila mohunahuna ug moaninaw sa ilang pagbati. Sultihi ko bi. Unsa may tono sa pagsulti ni Andrew nimo, sinalbahis ba o malumanay?”

“Aw, dili man sinalbahis hinuon. As usual, hinay ra pud niya pagkasulti pero murag nasagmuyo paminawon,” tubag ni Aryana.

“Alangan man og magngisi siya mosulti nimo ana. Siyempre iyang gibati di man maayo. Mouyon sad na iyang pagkasulti,” pasabot ni Nicole.

“Hay salamat kay wala ra intawn nausab akong dodong Andrew.”

“Na hala! Hunong nag bakho diha kay tingale og mahibulong tu imong mga anak nga naghubag na sab na imong mga mata. Nalimot na nuon ko unsa tu akong tuyo nimo. Manawag lang kog balik unya,” ingon ni Nicole.