‘Programa sa PIFC kongkreto nga pagpadayag sa sinodo’ – Msgr. Fuentes

Ang Seminario Mayor de San Carlos ( SMSC) mipahigayon sa seremonyas sa paghuman sa Parish Intervention Family Collaborator (PIFC) Course alang sa Batch 9 didto sa St. Charles Borromeo Chapel, SMSC.

Kini nakapalig-on sa misyon sa seminaryo sap ag-umol dili lamang sa umaabot nga mga pari kondili lakip na ang mga kaubang layko sa misyon sa Simbahan.

Gisugdan ang kalihokan sa usa ka Santos nga Misa nga gipangulohan ni Msgr. Roger Fuentes (Vicar General). Uban niya sila si Padre Mhar Vincent Balili (Rector), Padre Jeffrey Uy (PIFC Program Director, ug uban pang mga bisita nga pari.

Sa iyang homiliya, gitumbok ni Fuentes nga ang PIFC program usa ka kongkreto nga pagpadayag sa lihok sa Espiritu Santo, nagsalamin sa espiritu sa sinodo ug sa damgo sa Artsidyosesis sa umaabot tuig 2026 sa pagkahimo nga ‘Listening Church.’

Gipahinumduman niya ang mga mi-gradwar nga ang matuod nga pagpamati usa ka ministeryo sa pagkaayo – usa ka matang sa matuod nga pagkakita sa mga hanig sa kasakit ug malisod nga kasinatian nga kasagaran nagpahilayo sa mga tawo sa pag-ila sa kaayo sulod kanila.

Sa ilang pagbalik sa ilang tagsa-tagsa ka komunidad aron pagkuyog sa mga tawo ug pamilya sa ilang panaw sa pagkaayo, giawhag sila ni Fuentes nga kanunay mamati ug una sa Dios, pagtugot sa Iyang tingog sa paggiya sa matag buhat sa pag-alagad ug gugma.

“A good listener is the one who feels that ‘I am listened to,’ and that ‘I am good,’ that ‘God loves me.’ That is the starting point. We can all be effective listeners if inside ourselves we have God already. If we know we are good, and that God loves us, therefore, we can also help others see that goodness in them,” ingon ni Fuentes.

85 ka mga mi-gradwar ang midawat sa ilang Certificate of Completion, samtang ang mga facilitators, lecturers, volunteers, ug mga misalmot nga mga parokya gihatagan sa Token of Appreciation.

Ang PIFC usa ka 72-ka oras nga programa kabahin sa pundamental nga teyoriya ug mga prinsipyo sa pagtambag ug aplikasyon niini sa ministeryo pastoral. Ang limtunganay nga gisubay niini mao ang tulo ka demensyon sa ‘psycho-spiritual’: intrapersonal; interpersonal; ug meta-personal.

Gibahin ang programa sa ka-upat: Understanding Personality; Basic Helping/Counseling Skills; Assessment Tools; ug Spiritual Direction and Discernment. Gipokusan usab kini ang upat ka ang-ang: individual; pre-marital; marital; ug familial.

Ang programa maghatag og kahigayonan sa mga mosalmot sa pagkat-on sa nagkalainlaing mga pamaagi sa pagtambag, mo-obserbar sila unsaon kini pagpahigayon, ug mosinati sila mismo sa paghimo niini ubos sa superbisyon. Ang kurso putol-putol ug ipahigayon kini sa SMSC.

Ang mga facilitators ug lecturers naglakip og mga pari, rehistrado nga mga psychologists, psychometricians, ug guidance counselors.

Ang aplikasyon sa ika-10 nga hugna sa Parish Intervention Family Collaborator (PIFC) Course abli na karon. Ang mga interesado nga aplikante mahimong mobisita sa SMSC alang sa interbiyu, pag-ila, ug enrolment hangtod Hulyo 18, 2026. Alang sa dugang kasayuran palihug ug dangop sa opisyal Facebook page sa SMSC: https://www.facebook.com/SMSC1783. | RCAC FB